قازاقستان مۇسىلماندار ءدىني باسقارماسى قاۋىپتى جۇقپالى اۋرۋلاردان قايتىس بولعان ادامنىڭ ءمايىتىن جەرلەۋگە قاتىستى جاڭا ءپاتۋا بەكىتتى. تىزىمدە Covid-19 ينفەكتسياسى دا بار.
شاريعات بويىنشا قايتىس بولعان مۇسىلماندى جۋىندىرۋ، كەبىندەۋ، وعان جانازا نامازىن وقۋ جانە جەرلەۋ – پارىز. قازاقستان مۇسىلماندار ءدىني باسقارماسىنىڭ كەڭەسى وتە قاۋىپتى جۇقپالى (تۋليارەميا، ەبولا، كوروناۆيرۋس، وبا ت.ب.) اۋرۋلاردان قايتىس بولعان ادامداردىڭ مايىتتەرىن جۋىندىرۋعا جانە جەرلەۋگە قاتىستى تومەندەگى شارالاردى جۇزەگە اسىرۋدى ماقۇلدادى:
ءمايىتتى جۋىندىرۋ
وتە قاۋىپتى دەرتتەن قايتىس بولعان ادامدى جۋىندىرۋ ءراسىمى ارنايى مەملەكەتتىك مەكەمەنىڭ سانيتاريالىق-ەپيدەميولوگيالىق تالاپتارىنا سايكەس جۇزەگە اسۋى ءتيىس. ءمايىتحانادا جۋىندىرۋ شاراسى شاريعات تالابىنا قايشى كەلمەسە، ءمايىتتى قايتا جۋىندىرۋ شارت ەمەس.
ءمايىتتى كەبىندەۋ
شاريعات تالابى بويىنشا، ءمايىت كەبىندەلۋى مىندەت. ەر كىسى 3 قابات ماتامەن، ال ايەل 5 قابات ماتامەن كەبىندەلەدى. الايدا، جۇقپالى دەرتكە شالدىعىپ قايتىس بولعان كىسىگە كەبىندەۋ ءىسى، سانيتارلىق قاعيدالاردى ساقتايتىن ارناۋلى قىزمەتكەردىڭ تاراپىنان جاسالادى. سوندىقتان، ءمايىتحانادا كەبىندەلگەن ءمايىت شاريعاتقا ساي بولسا، قايتا كەبىندەۋ شارت ەمەس.
جانازا نامازىن وقۋ
قاۋىپتى ىندەتكە بايلانىستى جاريالانعان توتەنشە جاعدايدا جانازا نامازىنا مارقۇمنىڭ ەڭ جاقىن تۋىستارىنىڭ قاتىسۋى جەتكىلىكتى. ساقتىق شارالارى ءۇشىن ادام سانىن بارىنشا ازايتۋ كەرەك. قالالىق جاعدايدا ىندەتتىڭ قوعامدىق ورتاعا (كوپقاباتتى ءۇي تۇرعىندارىنا، كورشىلەرىنە ت.ب) تارالماۋى ءۇشىن مارقۇمدى ءمايىتحانادان تىكەلەي زيرات باسىنا اپارىپ، سول جەردە جانازا نامازىن وقىپ، جەرلەۋگە شاريعاتتا رۇقسات ەتىلگەن. جانازا راسىمدەرىن جەرگىلىكتى يمام اتقارادى. ناماز وقىعان كەزدە سانيتارلىق نورماعا ساي ءمايىت يمام مەن جاماعاتتان قاشىق جەرگە قويىلادى.
ءمايىتتى جەرلەۋ
ءمايىتتى زيراتقا دەنساۋلىق ساقتاۋ مەكەمەسىنىڭ ماماندارى ارنايى كولىكپەن جەتكىزەدى. قابىر ەپيدەميولوگيالىق نورماعا ساي قازىلۋى ءتيىس. ءمايىتتى جەرلەۋ راسىمىندە بيوقاۋىپسىزدىك شارالارى قاتاڭ ساقتالۋى ءتيىس. جەرلەۋدىڭ بارلىق ءراسىمىن مەديتسينا ماماندارى جۇزەگە اسىرعانى ابزال. سانيتاريالىق-ەپيدەميولوگيالىق مەكەمەسىنىڭ رۇقساتىنسىز ءمايىتتى ۇيىنە نەمەسە باسقا مەكەن-جايعا (وزگە قالا، تۋعان جەرىنە) اپارماعان دۇرىس. مۇنداعى ماقسات – جۇقپالى ىندەتتىڭ وزگە ايماقتارعا تارالۋىنىڭ الدىن الۋ.
ەگەر سانيتاريالىق-ەپيدەميولوگيالىق مەكەمەسى تاراپىنان ءمايىتتى شاريعات جولىمەن جۋىندىرۋعا، كەبىندەۋگە رۇقسات بەرىلمەسە شاريعاتتىڭ زارۋلىك ۇكىمى نەگىزگە الىنادى. ءمايىتحانادا ورالعان ماتا، ارنايى قاپ نەمەسە تابىت اشىلماستان جەرلەنەدى. جانازا نامازى مايىتتەن الىس تۇرىپ وقىلادى.
