تايلاند كوروناۆيرۋستىڭ تارالۋىن توقتاتۋ ءۇشىن 26 ناۋرىزدان باستاپ ەلگە كىرىپ-شىعۋدى تولىق توقتاتادى. بەيسەنبى كۇننەن باستاپ اۋەجاي، تەڭىز جانە شەكاراداعى بەكەتتەر جابىلادى. توتەنشە جاعداي جونىندەگى مەملەكەتتىك كوميتەتتىڭ كوروناۆيرۋسقا بايلانىستى ەرەكشە بۇيرىعى قابىلدانعانعا دەيىن شەكتەۋلەر كۇشىندە بولادى.
توتەنشە جاعداي رەجيمى 30 ساۋىرگە دەيىن سوزىلادى. وسى ۋاقىت ارالىعىندا ستاديوندار، ساۋدا نىساندارى، ويىن-ساۋىق ورتالىقتارى، كينوتەاترلار، بار، مەيرامحانا، جاعاجايلار جۇمىسىن توقتاتادى. ازىق-تۇلىك دۇكەندەرى عانا ىستەيدى.
26 ناۋرىزدان باستاپ پرەمەر-مينيستر نەمەسە ارنايى قۇزىرلى ورگاننىڭ رۇقساتىن العان ادامدار عانا ەلگە كىرە الادى. ديپلوماتتار مەن ولاردىڭ وتباسى مۇشەلەرى، حالىقارالىق ۇيىم قىزمەتكەرلەرى، اۋە جانە كەمە ەكيپاجىنىڭ مۇشەلەرىنە عانا ەلدەن شىعۋعا رۇقسات. بۇعان قوسا، تايلاندقا شۇعىل جۇك جەتكىزگەن جۇمىسشىلار، حالىقارالىق كەلىسىمگە سايكەس بەلگىلى ءبىر تاپسىرمانى ورىنداۋمەن اينالىسقان سىرتقى ىستەر مينيسترلىگىنىڭ حاتى بار قىزمەتكەرلەر ەلدەن شىعا الادى.
سوڭعى دەرەك بويىنشا، تايلاندتا 934 ادامعا كوروناۆيرۋس جۇققان. ءتورت ناۋقاس قايتىس بولدى. 70 ادام ايىقتى.
ازاتتىق راديوسى
