Taıland koronavırýstyń taralýyn toqtatý úshin 26 naýryzdan bastap elge kirip-shyǵýdy tolyq toqtatady. Beısenbi kúnnen bastap áýejaı, teńiz jáne shekaradaǵy beketter jabylady. Tótenshe jaǵdaı jónindegi memlekettik komıtettiń koronavırýsqa baılanysty erekshe buıryǵy qabyldanǵanǵa deıin shekteýler kúshinde bolady.
Tótenshe jaǵdaı rejımi 30 sáýirge deıin sozylady. Osy ýaqyt aralyǵynda stadıondar, saýda nysandary, oıyn-saýyq ortalyqtary, kınoteatrlar, bar, meıramhana, jaǵajaılar jumysyn toqtatady. Azyq-túlik dúkenderi ǵana isteıdi.
26 naýryzdan bastap premer-mınıstr nemese arnaıy quzyrly organnyń ruqsatyn alǵan adamdar ǵana elge kire alady. Dıplomattar men olardyń otbasy músheleri, halyqaralyq uıym qyzmetkerleri, áýe jáne keme ekıpajynyń múshelerine ǵana elden shyǵýǵa ruqsat. Buǵan qosa, Taılandqa shuǵyl júk jetkizgen jumysshylar, halyqaralyq kelisimge sáıkes belgili bir tapsyrmany oryndaýmen aınalysqan syrtqy ister mınıstrliginiń haty bar qyzmetkerler elden shyǵa alady.
Sońǵy derek boıynsha, Taılandta 934 adamǵa koronavırýs juqqan. Tórt naýqas qaıtys boldy. 70 adam aıyqty.
Azattyq radıosy
