رەسەيدە سوڭعى ءبىر كۇندە 71 ادامنان كوروناۆيرۋس تابىلدى. بۇل تۋرالى پرەمەر-مينيستر ميحايل ميشۋستين حابارلادى. ەلدە ۆيرۋس جۇققاندار سانى 438 ادام بولدى.
كوروناۆيرۋس جاعدايىن باقىلاۋ جونىندەگى شۇعىل شتابىنىڭ دەرەگىنشە، دەرتكە جاڭادان شالدىققانداردىڭ بارلىعى ماسكەۋدەن انىقتالعان.
ميشۋستين ناۋقاستارمەن بايلانىستا بولعانداردى انىقتاۋدىڭ ىڭعايلى جۇيەسىن قالىپتاستىرۋدى تاپسىردى. پرەمەر-ءمينيستردىڭ پىكىرىنشە، ۇيالى بايلانىس وپەراتورلارىنىڭ دەرەگىن وسى ماقساتتا پايدالانۋعا بولادى.
ول سونىمەن بىرگە ەگدە ادامداردى ۇيدەن شىقپاۋعا شاقىردى.
ماسكەۋ مەرى سەرگەي سوبيانين 26 ناۋرىز بەن 14 ءساۋىر ارالىعىندا 65 جاستان اسقان قالا تۇرعىندارى مەن سوزىلمالى اۋرۋعا شالدىققان ادامدار ۇيدە وتىرۋى ءتيىس دەپ ايتتى. مەردىڭ رەسمي سايتىندا وسى تۋرالى ارنايى جارلىق ءماتىنى دە جاريالاندى.
وعان سايكەس، جۇمىس بەرۋشىلەر قىزمەتكەرلەرىن قاشىقتان جۇمىس ىستەۋگە كوشىرۋى ءتيىس نەمەسە تولەنەتىن دەمالىسقا جىبەرۋى كەرەك. تەك وتە ماڭىزدى كاسىپورىن مەن مەكەمەلەر، دەنساۋلىق ساقتاۋ سالاسى قىزمەتكەرلەرى عانا جۇمىسىن جالعاسا بەرەدى.
ۇيدە كارانتيندە وتىرعاندارعا 4 مىڭ رۋبل (شامامەن 50 دوللار نەمەسە 22 مىڭ تەڭگە) كولەمىندە ءبىر رەتتىك كومەك بەرىلەدى. جارتىسى كارانتيننىڭ باسىندا، جارتىسى اياعىندا تولەنەدى. كوممۋنالدىق تولەمدەردى كەشىكتىرگەن تۇرعىنداردىڭ تولەمىنە وسىماقى قوسىلمايدى.
23 ناۋرىزدان باستاپ رەسەي كوروناۆيرۋسقا بايلانىستى تۇركيا، تايلاندقا قاتىنايتىن ۇشاق رەيستەرىن ازايتقان. قازىر بۇل ەلدەرگە تەك ماسكەۋدەن عانا ۇشۋعا بولادى. بۇعان دەيىن "اەروفلوت" اۋە كومپانياسى ەۋروپانىڭ بىرقاتار ەلىنە رەيستەردى شەكتەگەن.
الەمدە Covid-19 كوروناۆيرۋسى 336 مىڭنان استام ادامعا جۇقتى. قازا بولعاندار سانى 14 مىڭنان اسىپ كەتتى. ۆيرۋس 180-نەن استام ەلگە تارادى. 98 مىڭنان استام ادام دەرتتەن ايىققان.
"ازاتتىق" راديوسى
