Reseıde sońǵy bir kúnde 71 adamnan koronavırýs tabyldy. Bul týraly premer-mınıstr Mıhaıl Mıshýstın habarlady. Elde vırýs juqqandar sany 438 adam boldy.
Koronavırýs jaǵdaıyn baqylaý jónindegi shuǵyl shtabynyń dereginshe, dertke jańadan shaldyqqandardyń barlyǵy Máskeýden anyqtalǵan.
Mıshýstın naýqastarmen baılanysta bolǵandardy anyqtaýdyń yńǵaıly júıesin qalyptastyrýdy tapsyrdy. Premer-mınıstrdiń pikirinshe, uıaly baılanys operatorlarynyń deregin osy maqsatta paıdalanýǵa bolady.
Ol sonymen birge egde adamdardy úıden shyqpaýǵa shaqyrdy.
Máskeý meri Sergeı Sobıanın 26 naýryz ben 14 sáýir aralyǵynda 65 jastan asqan qala turǵyndary men sozylmaly aýrýǵa shaldyqqan adamdar úıde otyrýy tıis dep aıtty. Merdiń resmı saıtynda osy týraly arnaıy jarlyq mátini de jarııalandy.
Oǵan sáıkes, jumys berýshiler qyzmetkerlerin qashyqtan jumys isteýge kóshirýi tıis nemese tólenetin demalysqa jiberýi kerek. Tek óte mańyzdy kásiporyn men mekemeler, densaýlyq saqtaý salasy qyzmetkerleri ǵana jumysyn jalǵasa beredi.
Úıde karantınde otyrǵandarǵa 4 myń rýbl (shamamen 50 dollar nemese 22 myń teńge) kóleminde bir rettik kómek beriledi. Jartysy karantınniń basynda, jartysy aıaǵynda tólenedi. Kommýnaldyq tólemderdi keshiktirgen turǵyndardyń tólemine ósimaqy qosylmaıdy.
23 naýryzdan bastap Reseı koronavırýsqa baılanysty Túrkııa, Taılandqa qatynaıtyn ushaq reısterin azaıtqan. Qazir bul elderge tek Máskeýden ǵana ushýǵa bolady. Buǵan deıin "Aeroflot" áýe kompanııasy Eýropanyń birqatar eline reısterdi shektegen.
Álemde Covid-19 koronavırýsy 336 myńnan astam adamǵa juqty. Qaza bolǵandar sany 14 myńnan asyp ketti. Vırýs 180-nen astam elge tarady. 98 myńnan astam adam dertten aıyqqan.
"Azattyq" radıosy
