دينا ەلگەزەك: اۋ، شىراق، مىناۋ نە باعا؟

2028
Adyrna.kz Telegram

تاشكەن پوميدورى 3 مىڭ، الما 1800, كارتوپ 260, بانان 2 مىڭ، قىمىز مىڭ تەڭگە.
-اۋ، شىراق، مىناۋ نە باعا؟ قازاقتىڭ باسىنا كۇن تۋا قالسا، (قۇداي ونىڭ جولىن ارمەن قىلسىن) 30جىل ەلدى جالماعان جەمقور جالماۋىزدارعا ۇقساپ ەلدى ەڭ ءبىرىنشى بولىپ سەندەر قۇرتاتىن شىعارسىڭدار. ءوز قازاعىڭنىڭ جاعدايىنا ءۇڭىلىپ، اپپەتيتتەرىڭدى كىشكەنە تىيساڭدارشى",-دەپ سويلەپ كەتتىم ءۇيدىڭ جانىنداعى كوكىنىس ساتاتىن ساۋداگەرگە.
جوعارىداعىلار اساپ جەسە، تومەندەگىلەر تىستەپ جەيدى، سوندا اۋپىرىممەن كۇن كورگەن قالىڭ قازاقتان نە قالادى؟
ادامنىڭ كوز جاسى مەن حالىقتىڭ نالاسىنان اقشا جاساۋعا ارلانباعان ازعىندار اقىل ايتادى تاعى جۇرتقا: "پانيكەرلەر كورونوۆيرۋس سەكىلدى مەملەكەتكە قاۋىپتى" دەپ. ازعانتاي ايلىعىنا كۇنەلتىپ - كۇنكورىپ جۇرگەن كوپتىڭ كوز الدىندا تەڭگەسى تەڭسەلىپ، ازىق-تۇلىك باعاسى اسپانداپ بارا جاتسا، كەدەيلىكتەن زىعىرى شىققان ەل پانيكەر بولماعاندا قايتەدى؟ ىندەتتەن قورعانۋ ءۇشىن 2 ساعات سايىن 150 تەڭگەلىك ماسكاسىن كۇندەلىكتى 6 رەت اۋىستىرىپ تۇرۋ ءۇشىن اپتاسىنا 5400 تەڭگە كەرەك ەكەن. ءبىر ايدا ءبىر ادام ءوزىن-ءوزى ماسكامەن قامتۋ ءۇشىن 21 مىڭ جۇمساۋى قاجەت. قازاق پانيكاعا تۇسپەي قايتەدى؟ گەنىندە قاساقانا جاسالعان اشتىقتىڭ ۇرەيى ساقتالعان قازاق ورە تۇرەگەلىپ ازىق-تۇلىك ساتىپ الماي قايتەدى؟ تۋىستىق كلاننىڭ قامىن كۇيتتەپ ەلگە نە قادىرى، نە سەنىمى قالماعان بيلىگى بار حالىق پانيكەر بولماي قايتەدى؟
الاڭداپ قالعان ەلدى كورونوۆيرۋسقا تەڭەگەنى قاي ساسقانى؟ بۇل نە زىركىل ءوزى؟
ناعىز كورونوۆيرۋس - حالىقتىڭ اڭعالدىعى مەن نەسىبەسىنەن اقشا تاپقان جەمقورلار مەن ازىق-تۇلىكتى ون ەسە ۇستەمەلەگەن الىپ-ساتارلار!
"قالادا كەشە سيرەنا دابىل قاققاندا تۇلا-بويىم قالتىراپ كەتتى. باعا مىناۋ، بالا اناۋ، حالىقتى باسۋدىڭ ورنىنا زىرك-زىرك ەتكەن بيلىك، "ماگازيندى سولايىمەن كوتەرىپ كەتىپتى" دەپ كوپكە قارق-قارق كۇلگەن الەۋمەتتىك جەلى. ومىردەن ءتۇڭىلىپ كەتتىم، اپوكاليپسيس جاقىنداپ قالدى ما؟!", -دەپ كورشىمنىڭ كوزى ءمولت-ءمولت ەتەدى...
ءيا...
مىناۋ ىندەت اينالدىرعان بىرنەشە ايدا "ميروۆوي پوريادوكتى" قانا وزگەرتكەن جوق، كۇللى ادامزاتقا وي سالدى. ءوزىمىز ەلەمەي جۇرگەن ەسىل ەركىندىكتىڭ قادىر-قاسيەتىن سەزىندىك. قاۋىپسىزدىك - بەيعام تىرشىلىكتىڭ تىرەۋى ەكەنىن ۇقتىق. ادامزاتتىق اينالىمعا ەنىپ كەتكەن جاhاندانۋ پروتسەسسىنىڭ الىپ قۋاتىن، ودان قانشا وقشاۋلانساق تا ونى كەرى قايتارۋ مۇمكىن ەمەستىگىن، "كەمەدەگىنىڭ جانى ءبىر" ەكەنىن، جەر پلانەتاسىنىڭ - ورتاق، تۇتاس ەكەنىن ۇعىندىق. ايتپەسە، الەمدىك عالىمداردىڭ كورونوۆيرۋسقا قارسى ازىرلەپ جاتقان ەكپەسىن ەمەشەگىمىز ۇزىلە كۇتپەس ەدىك قوي.
بۇل وقيعا:
-اداسقانداردى رايىنان قايتاراتىن امال،
-ومىردەن تۇڭىلگەندەر ءۇشىن كورىنگەن ساۋلە،
-ارتتا قالعانداردى الىپ كەتەر پويىز،
-جولدا قالعاندارعا سالىنعان كوپىر،
-بارىنەن كۇدەر ۇزگەندەرگە اشىلعان ەسىك!
ادامزاتتىق وركەنيەتتى تەك قانا تەحنولوگيالىق پروگرەسس پەن ماتەريالدىق قۇندىلىقپەن ولشەپ كەلدىك. ال مىناۋ دۇنيەنى توڭكەرىپ جىبەرگەن عالامدىق ىندەت ادامزاتتىڭ دەنساۋلىعىنان ارتىق مۇرات جوق ەكەنىن تاعى ءبىر ايعاقىنداپ بەردى! بۇل ىندەت قولدان جاسالعان بيولوگيالىق قارۋ ما، الدە قاۋىپسىز تىرشىلىكتىڭ قادىرىن ۇقسىن دەپ قۇدايدىڭ ادامعا جىبەرگەن زاۋالى ما؟ ول جاعىنا باس قاتىرعىم كەلمەيدى. ويتكەنى، كەز-كەلگەن دۇنيەنىڭ سىرى ەرتە مە، كەش پە اشىلارى حاق جانە دۇنيەنى ءدۇر سىلكىندىرگەن وسىناۋ وقيعا ادامزات ءناسىلىنىڭ ميىنا جاڭا فايل جۇكتەدى دەپ سەنگىم كەلەدى. جاراتقاننىڭ ءامىرى الدىندا ادام اتاۋلى ءالسىز ەكەنىن تاعى ءىر دالەلدەدى!
ادامزات رۋحاني كەمەلدىلىكتىڭ كەلەسى ءبىر ساتىسىنا وتپەك. قازىرگى دۇربەلەڭ رۋحاني ەۆوليۋتسيالىق سەكىرىس الدىنداعى "پەرەزاگرۋزكا" دەپ ءوزىمدى سەندىرەمىن. ءبارى جاقسى بولادى! بۇرىن "قازاعىم امان بولسىن" دەپ اللادان جالبارىنىپ سۇراۋشى ەدىم (پوپۋليست دەپ سوكسەڭىزدەر ءوز ەرىكتەرىڭىز), قازىر تىلەگىم مەن جۇرەگىم وزگەردى! ادامزات امان بولسىن!

پىكىرلەر