DINA ELGEZEK: Aý, shyraq, mynaý ne baǵa?

19.03.2020

2047

Táshken pomıdory 3 myń, alma 1800, kartop 260, banan 2 myń, qymyz myń teńge.
-Aý, shyraq, mynaý ne baǵa? Qazaqtyń basyna kún týa qalsa, (Qudaı onyń jolyn ármen qylsyn) 30jyl eldi jalmaǵan jemqor jalmaýyzdarǵa uqsap eldi eń birinshi bolyp sender qurtatyn shyǵarsyńdar. Óz qazaǵyńnyń jaǵdaıyna úńilip, appetıtterińdi kishkene tyısańdarshy",-dep sóılep kettim úıdiń janyndaǵy kókinis satatyn saýdagerge.
Joǵarydaǵylar asap jese, tómendegiler tistep jeıdi, sonda áýpirimmen kún kórgen qalyń qazaqtan ne qalady?
Adamnyń kóz jasy men halyqtyń nalasynan aqsha jasaýǵa arlanbaǵan azǵyndar aqyl aıtady taǵy jurtqa: "panıkerler koronovırýs sekildi memleketke qaýipti" dep. Azǵantaı aılyǵyna kúneltip - kúnkórip júrgen kóptiń kóz aldynda teńgesi teńselip, azyq-túlik baǵasy aspandap bara jatsa, kedeılikten zyǵyry shyqqan el panıker bolmaǵanda qaıtedi? Indetten qorǵaný úshin 2 saǵat saıyn 150 teńgelik maskasyn kúndelikti 6 ret aýystyryp turý úshin aptasyna 5400 teńge kerek eken. Bir aıda bir adam ózin-ózi maskamen qamtý úshin 21 myń jumsaýy qajet. Qazaq panıkaǵa túspeı qaıtedi? Geninde qasaqana jasalǵan ashtyqtyń úreıi saqtalǵan qazaq óre túregelip azyq-túlik satyp almaı qaıtedi? Týystyq klannyń qamyn kúıttep elge ne qadyry, ne senimi qalmaǵan bıligi bar halyq panıker bolmaı qaıtedi?
Alańdap qalǵan eldi koronovırýsqa teńegeni qaı sasqany? Bul ne zirkil ózi?
Naǵyz koronovırýs - halyqtyń ańǵaldyǵy men nesibesinen aqsha tapqan jemqorlar men azyq-túlikti on ese ústemelegen alyp-satarlar!
"Qalada keshe sırena dabyl qaqqanda tula-boıym qaltyrap ketti. Baǵa mynaý, bala anaý, halyqty basýdyń ornyna zirk-zirk etken bılik, "magazındi solaıymen kóterip ketipti" dep kópke qarq-qarq kúlgen áleýmettik jeli. Ómirden túńilip kettim, apokalıpsıs jaqyndap qaldy ma?!", -dep kórshimniń kózi mólt-mólt etedi...
Iá...
Mynaý indet aınaldyrǵan birneshe aıda "mırovoı porıadokty" qana ózgertken joq, kúlli adamzatqa oı saldy. Ózimiz elemeı júrgen esil erkindiktiń qadyr-qasıetin sezindik. Qaýipsizdik - beıǵam tirshiliktiń tireýi ekenin uqtyq. Adamzattyq aınalymǵa enip ketken jahandaný proessiniń alyp qýatyn, odan qansha oqshaýlansaq ta ony keri qaıtarý múmkin emestigin, "kemedeginiń jany bir" ekenin, jer planetasynyń - ortaq, tutas ekenin uǵyndyq. Áıtpese, álemdik ǵalymdardyń koronovırýsqa qarsy ázirlep jatqan ekpesin emeshegimiz úzile kútpes edik qoı.
Bul oqıǵa:
-adasqandardy raıynan qaıtaratyn amal,
-ómirden túńilgender úshin kóringen sáýle,
-artta qalǵandardy alyp keter poıyz,
-jolda qalǵandarǵa salynǵan kópir,
-bárinen kúder úzgenderge ashylǵan esik!
Adamzattyq órkenıetti tek qana tehnologııalyq progress pen materıaldyq qundylyqpen ólshep keldik. Al mynaý dúnıeni tóńkerip jibergen ǵalamdyq indet adamzattyń densaýlyǵynan artyq murat joq ekenin taǵy bir aıǵaqyndap berdi! Bul indet qoldan jasalǵan bıologııalyq qarý ma, álde qaýipsiz tirshiliktiń qadyryn uqsyn dep Qudaıdyń adamǵa jibergen zaýaly ma? Ol jaǵyna bas qatyrǵym kelmeıdi. Óıtkeni, kez-kelgen dúnıeniń syry erte me, kesh pe ashylary haq jáne dúnıeni dúr silkindirgen osynaý oqıǵa adamzat násiliniń mıyna jańa faıl júktedi dep sengim keledi. Jaratqannyń ámiri aldynda adam ataýly álsiz ekenin taǵy ir dáleldedi!
Adamzat rýhanı kemeldiliktiń kelesi bir satysyna ótpek. Qazirgi dúrbeleń rýhanı evolıýııalyq sekiris aldyndaǵy "perezagrýzka" dep ózimdi sendiremin. Bári jaqsy bolady! Buryn "qazaǵym aman bolsyn" dep Alladan jalbarynyp suraýshy edim (popýlıst dep sókseńizder óz erikterińiz), qazir tilegim men júregim ózgerdi! Adamzat aman bolsyn!