قازىر دارىگەرلەر ءتورت اۋىسىممەن جۇمىس ىستەپ جاتىر. ەكى-ءۇش ايدا ولاردىڭ جالاقىسىن كوتەرۋ جوسپارلانىپ وتىر
دەنساۋلىق ساقتاۋ مينيسترلىگى كوروناۆيرۋسپەن كۇرەسكە جۇمىلدىرىلعان دارىگەرلەردىڭ جالاقىسىن ەكى-ءۇش ەسەگە كوتەرەدى. بۇل تۋرالى ۆەدومستۆونىڭ رەسمي وكىلى دياس احمەتشارىپ مالىمدەدى.
ول توتەنشە جاعدايعا بايلانىستى اق حالاتتىلاردىڭ جۇمىس كەستەسى وزگەرگەنىن اتاپ ءوتتى. قازىر دارىگەرلەر ءتورت اۋىسىممەن جۇمىس ىستەيدى.
"مينيسترلىك تاراپىنان تولىققاندى قولداۋ بار. ءمينيستردىڭ بۇيرىعى بار، العى شەپتە جۇرگەن دارىگەرلەرگە ەكى-ءۇش ايدا جالاقىسىن 2-3 ەسە كوتەرۋ قاراستىرىلىپ وتىر،" - دەدى احمەتشارىپ ۇلتتىق ارناداعى "اشىق الاڭ" باعدارلاماسىندا.
سوڭعى دەرەك بويىنشا، قازاقستاندا 27 ادام كوروناۆيرۋس جۇقتىردى. ونىڭ 13-ءى الماتىدا، قالعان 14-ءى نۇر-سۇلتان قالاسىندا.
ايتا كەتسەك، ىندەتكە شالدىققاندار اراسىندا ەكى جاسار ءسابي دە بار.
1536 ادام ستاتسيونارلىق كارانتيندە، ال 1094 ادام ءۇي كارانتينىنە الىنعان.
كوروناۆيرۋستىڭ الدىن الۋ ماقساتىندا ەلىمىزدە 16 ناۋرىز تاڭعى ساعات 08.00-دەن باستاپ توتەنشە جاعداي رەجيمى جاريالاندى. ول 15 ءساۋىر تاڭعى 07.00-گە دەيىن كۇشىندە بولادى.
