دەنساۋلىق ساقتاۋ ءمينيسترى ەلجان ءبىرتانوۆ ەلگە كوروناۆيرۋسپەن ورالىپ، كارانتيننەن جاسىرىناتىن ادامدارعا ەسكەرتۋ جاسادى، - دەپ حابارلايدى Tengrinews.kz تىلشىسى.

"ارينە، كەيبىر جاعدايدا ازاماتتار تىعىلىپ، قايدان كەلگەندەرىن جاسىرادى. وكىنىشكە قاراي، ءبىزدىڭ جاۋاپسىز ازاماتتارىمىز بار. ءبىز بۇل پروبلەمانى شەشۋ ءۇشىن تەحنيكالىق ماسەلەلەرىن قاراستىرىپ جاتىرمىز", - دەدى ءبىرتانوۆ وكق-دا وتكەن بريفينگتە.

ول باس سانيتارلىق دارىگەر جانداربەك بەكشيننىڭ ارنايى جارلىعى تۋرالى ايتتى.

"كارانتيننەن باس تارتقان نەمەسە قاشىپ جۇرگەن ازاماتتارعا ايتقىم كەلەدى: بۇل جەردە اكىمشىلىك جاۋاپكەرشىلىك بار. ەگەر ول اۋىرىپ، باسقا ازاماتتارعا جۇقتىرسا، زاڭدا قىلمىستىق جاۋاپكەرشىلىك قاراستىرىلعان", - دەپ ەسكەرتتى مينيستر.

ەسكە سالايىق، 1ا ساناتىنداعى ەلدەر - قىتاي، يران، وڭتۇستىك كورەيا جانە يتاليادان كەلگەن ازاماتتار 14 كۇن بويى مىندەتتى كارانتينگە جاتادى. 1ۆ ساناتىنداعى ەلدەر - فرانتسيا، گەرمانيا جانە يسپانيادان كەلگەندەر ۇيىندە 14 كۇنگە وقشاۋلانۋى كەرەك.