قوستاناي قالاسىندا سەمينار-ترەنينگ ءوتتى

3078
Adyrna.kz Telegram

ەلىمىزدىڭ تاۋەلسىزدىك العانىنا 25 جىل تولۋىنا وراي قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى قوستاناي قالاسىندا «ءتىل مەرەيى» رەسپۋبليكالىق شاراسىن وتكىزدى.

شارانىڭ ماقساتى مەملەكەتتىك ءتىلدى تۇرعىندارعا ۇيرەتەتىن وقىتۋشىلاردىڭ كاسىبي بىلىكتىلىگىن جەتىلدىرۋ، ونلاين ادىسىمەن  وزىق تاجىريبەلەردى الماسۋ جانە مەملەكەتتىك ءتىلدى وقىتۋ ورتالىقتارىنىڭ وقىتۋشىلارىن ىنتالاندىرۋ بولىپ تابىلادى.

شارانىڭ اشىلۋىندا ءسوز العان تىلدەردى دامىتۋ جانە قوعامدىق-ساياسي جۇمىس كوميتەتى تىلدەردى دامىتۋ جانە مونيتورينگ  باسقارماسىنىڭ باسشىسى تولقىن جولدىبايقىزى ساباق وتەتىن ادىسكەرلەرگە ساتتىلىك تىلەپ، قۇتتىقتاۋ ءسوزىن جالعادى.

 شاراعا ادىسكەر-عالىمدار، ءتىل ماماندارى، ءتىل ۇيرەنۋشىلەر، استانا، الماتى قالالارى جانە وبلىس ورتالىقتارىنداعى مەملەكەتتىك ءتىلدى وقىتۋ ورتالىقتارىنىڭ وقىتۋشى ادىسكەرلەرى قاتىستى.

شارا بارىسىندا ادىسكەر-عالىمدار مەملەكەتتىك ءتىلدى وقىتۋدىڭ ءتيىمدى تەحنولوگيالارى جانە ءادىس-تاسىلدەرىمەن ءبولىستى. قوستاناي وبلىسى اكىمدىگى تىلدەردى دامىتۋ باسقارماسى  تىلدەردى وقىتۋدىڭ وبلىستىق ورتالىعىنىڭ ۇزدىك وقىتۋشىلارى پانورامالىق ساباقتار مەن ونلاين رەجيمىندە شەبەرلىك ساباقتارىن كورسەتىپ، تاجىريبە الماستى.  ەلىمىزگە تانىمال عالىم، فونەتيكا سالاسىن جان-جاقتى زەرتتەپ، ادىستەمە، اسىرەسە، ءتىل ۇيرەتۋدە ەرەن ەڭبەك تانىتىپ جۇرگەن ءالىمحان جۇنىسبەك سەمينار بارىسىندا بايانداما جاساپ، گرامماتيكاسىز وقىتۋدىڭ ءتيىمدى ادىستەرىن وقىتۋشىلارعا تارتۋ ەتتى. دىبىستان باستاپ، سويلەم قۇراۋدىڭ جاڭاشا ۇلگىلەرىن كورسەتكەن عالىم، ءتىل ۇيرەتۋدە ناتيجەلى كورسەتكىشكە جەتۋ ءۇشىن وسى تاسىلدەردى قولدانۋدىڭ ءتيىمدى ەكەنىن تولىقتاي ءتۇسىندىرىپ ءوتتى. شەبەرلىك ساباقتارىن كورسەتكەن ادىسكەرلەرگە ساراپتاما جاساعان ەگىزباەۆا نازىكەن جانەنقىزى قازتەست جۇيەسىنە نەگىزدەلگەن ساباقتاردىڭ ارتىقشىلىعى مەن كەمشىلىگىن تاراتىپ ايتىپ، دەيگەيلەرلىڭ ەرەجەلەرىنە شولۋ جاسادى. مودەراتور ەربول تىلەشوۆ ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى قولعا الىپ جاتقان جاڭا جوبانىڭ مازمۇنىمەن تانىستىرىپ، الداعى ۋاقىتتاعى ادىستەمەگە قاتىستى بولجامدارىن جاسادى. سەمينارعا قاتىسقان بارلىق ادىسكەرلەرگە سەرتيفيكات بەرىلدى.


"انا ءتىلى"

 

پىكىرلەر