Qostanaı qalasynda semınar-trenıng ótti

2912

Elimizdiń táýelsizdik alǵanyna 25 jyl tolýyna oraı Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti Qostanaı qalasynda «Til mereıi» respýblıkalyq sharasyn ótkizdi.

Sharanyń maqsaty memlekettik tildi turǵyndarǵa úıretetin oqytýshylardyń kásibı biliktiligin jetildirý, onlaın ádisimen  ozyq tájirıbelerdi almasý jáne memlekettik tildi oqytý ortalyqtarynyń oqytýshylaryn yntalandyrý bolyp tabylady.

Sharanyń ashylýynda sóz alǵan Tilderdi damytý jáne qoǵamdyq-saıası jumys komıteti Tilderdi damytý jáne monıtorıng  basqarmasynyń basshysy Tolqyn Joldybaıqyzy sabaq ótetin ádiskerlerge sáttilik tilep, quttyqtaý sózin jalǵady.

 Sharaǵa ádisker-ǵalymdar, til mamandary, til úırenýshiler, Astana, Almaty qalalary jáne oblys ortalyqtaryndaǵy memlekettik tildi oqytý ortalyqtarynyń oqytýshy ádiskerleri qatysty.

Shara barysynda ádisker-ǵalymdar memlekettik tildi oqytýdyń tıimdi tehnologııalary jáne ádis-tásilderimen bólisti. Qostanaı oblysy ákimdigi Tilderdi damytý basqarmasy  Tilderdi oqytýdyń oblystyq ortalyǵynyń úzdik oqytýshylary panoramalyq sabaqtar men onlaın rejıminde sheberlik sabaqtaryn kórsetip, tájirıbe almasty.  Elimizge tanymal ǵalym, fonetıka salasyn jan-jaqty zerttep, ádisteme, ásirese, til úıretýde eren eńbek tanytyp júrgen Álimhan Júnisbek semınar barysynda baıandama jasap, grammatıkasyz oqytýdyń tıimdi ádisterin oqytýshylarǵa tartý etti. Dybystan bastap, sóılem quraýdyń jańasha úlgilerin kórsetken ǵalym, til úıretýde nátıjeli kórsetkishke jetý úshin osy tásilderdi qoldanýdyń tıimdi ekenin tolyqtaı túsindirip ótti. Sheberlik sabaqtaryn kórsetken ádiskerlerge saraptama jasaǵan Egizbaeva Nazyken Janenqyzy Qaztest júıesine negizdelgen sabaqtardyń artyqshylyǵy men kemshiligin taratyp aıtyp, deıgeılerliń erejelerine sholý jasady. Moderator Erbol Tileshov Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵy qolǵa alyp jatqan jańa jobanyń mazmunymen tanystyryp, aldaǵy ýaqyttaǵy ádistemege qatysty boljamdaryn jasady. Semınarǵa qatysqan barlyq ádiskerlerge sertıfıkat berildi.


"ANA TILI"

 

Pikirler
Redakııa tańdaýy