ارىسقا بولىنگەن ميللياردتار قايدا كەتتى؟ جارىلىستان زارداپ شەككەن ارىس كاسىپكەرلەرى جىرتىعىن ءالى جاماي الماي ءجۇر. سەبەبى، ولارعا بولىنگەن قاراجات جەتپەگەن. شاعىن جانە ورتا بيزنەسپەن اينالىسىپ جۇرگەندەرگە قازاقستاننىڭ الپاۋىت كومپانيالارى بىلتىر كومەك رەتىندە ميللياردتاپ اقشا جونەلتكەن ەدى. كاسىپكەرلەردىڭ ايتۋىنشا، سول قارجى جەرگىلىكتى شەنەۋنىكتەردىڭ كەسىرىنەن دىتتەگەن جەرىنە جەتپەي جاتىر. ماسەلەن، تىزىمگە جالعان بيزنەس نىساندارى ەنىپ، شىن زارداپ شەككەندەر قارجىدان قاعىلدى دەيدى ولار.
ارىستىق كاسىپكەر مۇحامەدجان ساپارحانوۆ قيراعان ءدامحاناسىن كۇيىنىشپەن كورسەتەدى. ءومىر بويى تام-تۇمداپ جيعانىن سالىپ، نەسيە الىپ اشقان ءدامحاناسىنىڭ شاڭىراعى بىلتىر شىلدەدە ورتاسىنا تۇسكەن. التى بالاسى بار ازامات شىعىنىن 50 ميلليون تەڭگەگە باعالايدى. بىراق باعالاۋشى كومپانيا 25 ميلليون دەپ كورسەتىپ، بىلتىر بەرۋى كەرەك بولعان. سول اقشانى كۇتىپ جۇرگەنىنە جارتى جىلدان اسىپتى.
مۇحامەدجان ساپارحانوۆ، كاسىپكەر:
- بىراق وسى ۋاقىتقا دەيىن وسى سەگىز ايدىڭ ىشىندە، ەڭ بولماسا سول شىعارعان اقشاسىن بەرسە، ءبىرتالاي تىرلىگىمدى جاماپ الار ەدىم عوي. 25 ميلليوننان. موينىمدا 2-3 كرەديت تۇر قازىر. قىسقى ۋاقىتتا جۇمىس جوق. نە ىستەيمىز؟ ارىستا مۇحامەدجان سياقتى زار جىلاپ جۇرگەن كاسىپكەر سانى الپىستان اسادى. بىرەۋىنىڭ دۇكەنى، بىرەۋىنىڭ مەيرامحاناسى قيراعان. جارىلىستان كەيىن قالاداعى 465 كوممەرتسيالىق نىسانعا قازاقستاننىڭ الپاۋىت كومپانيالارى كومەك بەرىپتى. بىراق ميللياردتاعان اقشا كوپ كاسىپكەرگە جەتپەي قالعان.
ۇبايدۋللا سۇيىنباەۆ، كاسىپكەر:
- وكىمەت سول كەزدە ەسەپتەپ وتىر عوي، 465 نىسانعا 3 ميلليارد 155 ميلليون. ءبىز سونىڭ 1 ميلليارد 300 ميلليوننىڭ كاساىپكەرگە تولەنگەنىن كوردىك. ودان كەيىن قالعان اقشانىڭ قايدا كەتكەنىن بىلمەيمىن. عيماراتتار ودان سايىن ءبۇلىنىپ جاتىر. قۇرىلىس ماتەريالدارى، قۇرىلىس زاتتارى قىمباتتاپ جاتىر. مىنە، بۇل جەردە جالعىز مەن ەمەس، 68 ادام ءجۇر. اقشاسىن الا الماي جۇرگەندەردىڭ قولىندا كاسىپكەرلەر پالاتاسى بەرگەن ءتىزىم بار. تىزىمدە قاي مەكەن-جايدا، قانداي دۇكەن الدە ءدامحانانىڭ ءبۇلىنىپ، قانشا اقشا الۋى كەرەك، نە العانى جازىلعان. كاسىپكەرلەردىڭ سوزىنشە، تىزىمدەگى ءبىراز نىسان قۇجاتتا بولعانىمەن، شىن مانىندە جوق ەكەن.
اناتولي رۋنكوۆ، كاسىپكەر:
- كەيبىر نىساندار قاعازدا عانا بار. كەيبىرى ءتىپتى ءۇش مارتەدەن جازىلعان. ءتىزىم قولىمىزعا تيگەن سوڭ، مۇندا كورسەتىلگەن نىساندار بويىنشا ءجۇرىپ كوردىك. كورسەتىلگەن مەكەن-جايدا بيزنەس نىساننىڭ ورنىنا كادىمگى ۇيلەر دە تۇر. وسىندايلار اقشا الىپ، بىزگە كوك تيىن دا بۇيىرماي تۇر. ال اقشانى ۇلەستىرگەن «مەنىڭ اتامەكەنىم» قورىنىڭ باسشىلىعى تىزىمگە كۇمان كەلتىرىپ وتىرعان جوق. دەگەنمەن زارداپ شەككەندەردى تۇگەندەگەن ولار ەمەس ەكەن. ءتىزىمدى باعالاۋشى كومپانيانىڭ دەرەگىنە سۇيەنىپ، تۇركىستان وبلىستىق قۇرىلىس باسقارماسى مەن سول كەزدە ارنايى قۇرىلعان شتاب جىبەرگەن.
ءلاززات شىڭعىسباەۆا، «مەنىڭ اتامەكەنىم» قب ديرەكتورى:
- 3 ملرد 97 ملن كىمگە جەتتى. 403 نىسانعا جەتتى. 62 نىسانعا بىزدە قاراجات جوق. جوق قاراجاتتى ءبىز قالاي بەرەمىز؟ جوق، ءبىتتى. قاراجات وسىنىڭ ءبارىنىڭ ەسەپتەرىن جازىپ، كانتسەليارياعا وتكىزدىك، ۇكىمەتكە. بۇل ەسەپتى ءىرى كومپانيالارعا دا بەردىك.
ارىستىق 60-تان استام كاسىپكەردىڭ شىعىنىن جابۋعا شامامەن 400 ميلليون تەڭگەدەي قاراجات كەرەك ەكەن. بۇل تۋرالى ۇسىنىس ۇكىمەتتىڭ كانتسەليارياسىندا جاتىر. ناقتى قاشان شەشىلەتىنىن ەشكىم دە ايتا المايدى. دەسە دە، اقشاسىن ەرتەرەك العىسى كەلگەن كاسىپكەرلەر وسىعان دەيىن بەرىلگەن مول قارجىنىڭ ءار تيىنىنا دەيىن تەكسەرىس جۇرگىزسە، ءبىراز بىلىقتىڭ بەتى اشىلارىنا سەنىمدى.
ktk.kz
