ول جاقتىڭ ادامدارى جالپى سونداي رۋھتى، قايسار، وجەت بولىپ كەلەدى. مەن كەيدە تاپ وسى شاعىن تورعايدان ەرجان تۇرعىمباي، ەرمەك نارىمباي جانە وسى دۋلاتتاي بەلگىلى وپپوزيتسيا وكىلدەرىنىڭ كوپتەپ شىققاندىعىنا تاڭعالاتىنمىن.
مەنىڭشە، تورعايلىقتار وزبىرلىققا، ادىلەتسىزدىككە توزبەيتىن، ادىلدىك ىزدەپ شىرقىراپ تۇراتىن سەزىمتال حالىق، تابيعاتتارى سونداي سياقتى.
باياعىدا حان كەنە حاندىق قۇرامىن دەپ اتقا قونعاندا، وسى تورعاي ءوڭىرى ونى ەڭ العاش قىزۋ قولداپ شىققان ءوڭىر بوپتى. وسى وڭىردەن شىققان شاكىر باتىر، يمان باتىر (امانگەلدىنىڭ اتاسى) كەنە حاننىڭ بەلدى باتىرلارىنىڭ ءبىرى بوپتى.
ودان كەيىنگىلەرى امانگەلدى مەن كەيكى مەرگەن. ونى دا بىلەسىزدەر.
جانە بۇلاردا، ءبىر ايتا كەتەرلىگى، ەكى تورعايلىقتىڭ بىرەۋى ءاپايتوس پالۋان نەمەسە ءانشى - كۇيشى، وزدەرى كەرەمەت ونەرلى حالىق بولادى.
يا بولماسا اقىن - جازۋشى. ءبىزدىڭ اكەمىز دە سونداي تورعايدىڭ ءبىر ماقتانىشى - حالىق اقىنى قونىسباي ءابىل بولادى.
ول كىسىلەردىڭ ءتۇبى تورعايدىڭ كوكالات اۋىلىنان، ول اۋىلدان تاعى تولەن ابدىك، قويشىعارا سالعاريندەي قازاقتىڭ زيالى جامپوزدارى شىققان.
ول وڭىردەن مەن تانىمايتىن، ال وزدەرى كادىمگىدەي ماقتان تۇتاتىن دارىندى كىسىلەر قانشاما.
ونى كەزىندە ۇيدەگى ۇلكەندەردىڭ اڭگىمەسىنەن بايقاپ وتىراتىنمىن.
تورعايدىڭ ار جاعىن ايتساق الاشتىڭ زيالىلارى احمەت پەن مىرجاقىپقا كەتەمىز.
دۋلات سونداي ورتادان شىققان ەر ەدى. ول ناعىز تورعايدىڭ قايتپاس قايسار وعلانى بولاتىن، ال قازىر كۇللى قازاقتىڭ باتىرى اتاندى. زاتى - اقتى اق، قارانى قارا دەپ بىلش ەتكىزىپ بەتىڭە ايتىپ قاراپ تۇراتىن ادامدار قاتارىنان ەدى.
دۋلاتتىڭ اۋىلى الباربوگەت اۋىلى ەكەن، ول سول كوكالات، قىزبەل دەگەن تورعايدىڭ نەگىزگى اۋىلدارىنىڭ ءبىرى، ءبىر بىرىنە جاقىن.
وسى دۋلات ءتۇپ تامىرىمەن ءتىپتى وزىمە اعا بولىپ شىعۋى دا مۇمكىن دەپ تە شامالايمىن.
قالاي دەسەك تە ونىڭ قازاسى قوعامىمىزدى ءدۇر سىلكىندىرگەن اۋىر قازا بولدى.
ونىڭ سالدارى ءالى دە جالعاسادى، وعان مەن بەك سەنىمدىمىن، ونىڭ ارتى مىنا جۇيە ءۇشىن وتە جامان بولادى دەپ تە جوبالاپ وتىرمىن. وتە جامان.
ال ءور دۋلات، ەر دۋلات اعامىزدى ەندى قايتارا الماسىمىز انىق. ونىڭ قامكوڭىل ءۇي - ءىشى جانۇياسىنا، ازاماتتىڭ ارتىنىڭ قايىرىن بەرسىن، ەسىل ەردىڭ جانى پەيىشتەن بولسىن دەپ كوڭىل ايتقىم كەلەدى. يماندى بول باتىر، ءبىزدىڭ السىزدىگىمىزدى كەشىرە گور.
