وتكەن اپتادا كوروناۆيرۋسقا بايلانىستى تۇرعىندارى ءوز الاڭداۋشىلىقتارىن بىلدىرگەن زايسان اۋدانىنا بۇگىن جاڭا اكىم تانىستىرىلدى. ەستەرىڭىزگە سالا كەتەيىك، 19 اقپاندا زايسان اۋدانىنىڭ سارىتەرەك جانە اينابۇلاق اۋىلدارىنىڭ تۇرعىندارى «قىتايدان كەلگەندەردى كوروناۆيرۋسقا بايلانىستى وسى ەلدى مەكەندەردەگى مەديتسينالىق پۋنكتتەرگە ورنالاستىرادى» دەگەن انىق-قانىعى بەلگىسىز حاباردى ءبىر-بىرىنەن ەستىپ، بۇعان ءوز نارازىلىقتارىن بىلدىرگەن بولاتىن.
20 اقپاندا وبلىس اكىمى دانيال احمەتوۆ ارنايى بارىپ، ماسەلەنى جان-جاقتى تۇسىندىرگەننەن كەيىن عانا جەرگىلىكتى حالىق ساباسىنا تۇسكەن-ءدى. سول كەزدە تۇرعىندار وبلىس اكىمىنە: «كەشە اۋدان اكىمىن ساعات 3-تەن باستاپ كۇتتىك. تۇنگى ساعات 11 جارىمدا كەلدى. جەرگىلىكتى بيلىك حالىقپەن ساناسپايدى» دەپ اۋدان باسشىلىعىنىڭ جۇمىسىنا كوڭىلى تولمايتىندىقتارىن جەتكىزگەن ەدى. بۇگىن مىنە د.احمەتوۆ زايسان جۇرتشىلىعىنا وسى اۋداندى بۇعان دەيىن ءبىر مارتە باسقارعان سەرىك ءزاينۋلديندى تانىستىردى. ول بۇعان دەيىن ءۇرجار اۋدانىندا اكىم بولعان. «10 كۇننەن كەيىن زايسانعا تاعى دا كەلەمىن. شەكارالىق ايماقتاعى 5 اۋدانعا 207 ميلليارد تەڭگە قاراجات بولەمىز. ونىڭ ىشىندە زايسان دا بار» دەدى د.احمەتوۆ اۋدان اكىمىن تانىستىرعان جيىندا.
