قازاقستاندىقتار تويلاردى اتتاپ باسقان سايىن الدىڭنان شىعاتىن كەرەمەت مەيرامحانالاردا جاساپ كەلەدى. ال انگليادا جاز كەزىندە ۇيلەنۋ تويلارىن ارنايى ديزاينەرلىك كيىز ۇيلەردە اتاپ ءوتۋ سانگە اينالعان. 
بۇل تۋرالى stan.kz yvision.kz سايتىنا سىلتەمە جاساي وتىرىپ حابارلايدى.
ء“بىز سەرىكتەسىم ەكەۋمىز كيىز ءۇيدى وتە قاتتى ۇناتامىز. ويتكەنى، ىڭعايلى كونسترۋكتسياسىنىڭ ارقاسىندا ونى كەز-كەلگەن جەرگە ورناتۋعا بولادى. ول وتە ادەمى، ەرەكشە وبرازداعى ءۇي. كيىز ءۇي باس قوسىپ جاتقان ەكى جاسقا دا تاماشا اسەر سىيلايدى”، – دەيدى ليززي ەسىمدى “تويعا ارنالعان كيىز ۇيلەر” بيزنەس-جوباسىنىڭ اۆتورى.
كومپانيا كليەنتتەرگە كيىز ءۇيدى وزدەرى جەتكىزىپ، ونى قۇرىپ،تولىقتاي دايىن قىلىپ بەرەدى. سوندىقتان دا تاپسىرىس بەرۋشىلەردىڭ الاڭداۋىنا ەش نەگىز جوق. كيىز ءۇي بىرنەشە ساعاتتىڭ ىشىندە جىلدام جينالادى. بۇرىن كوشپەندى حالىقتاردىڭ اراسىندا بۇل شارۋامەن ايەلدەر مەن بالالار اينالىسىپ، نەبارى 1,5-2 ساعاتتىڭ ىشىندە جيناي العان. 
ۇيلەنۋ تويىنا ارنايى ازىرلەنگەن كيىز ۇيلەر ۋەلس شەبەرلەرىنىڭ قولىنان شىعىپتى. ماتەريال رەتىندە جەرگىلىكتى ورماندارداعى شىرىندى تالشان اعاشى قولدانىلعان.
ۇيلەنۋگە ارنالعان بۇل ۇيلەر ءداستۇرلى اق نەمەسە اشىق ءتۇستى زاتتارمەن ساندەلەدى. كوشپەندىلەر دە تازالىق پەن گۇلدەنۋدىڭ بەلگىسى سانالاتىن بۇل ءتۇس ۇيلەنۋگە ارنالعان كيىز ۇيلەردىڭ دە اجارىن اشا تۇسەدى. مەرەكەلىك كيىز ءۇيدى ءارتۇرلى فانتازيامەن ساندەپ، بەزەندىرۋگە بولادى.
سونىمەن قاتار كيىز ءۇي كەشەنىنە – قاتتى ەمەننەن جاسالعان ەدەن، قولدان جاسالعان جيھازدار جانە بارلىق فورماتتاعى بەزەندىرۋ بۇيىمدارى كىرەدى.
انگلياداعى ەڭ ءىرى يۆەنت-اگەنتتىككە تيەسىلى ەڭ ۇلكەن كيىز ءۇي 90-عا جۋىق قوناققا ارنالعان. بۇل اعىلشىن تويى ءۇشىن جەتكىلىكتى. ارينە، ادام كوبەيىپ كەتكەن جاعدايدا، ولار تاعى بىرنەشە كيىز ۇيگە تاپسىرىس بەرە الادى. كيىز ءۇي توي يەلەرى مەن توي قوناقتارىنا قايتالانباس اسەر مەن ەرەكشە اتموسفەرا سىيلايدى. 
تۇنگى ۋاقىتتا جۇلدىزدى اسپانمەن ۇندەسكەن كيىز ءۇي تىپتەن رومانتيكاعا تولى بولىپ كورىنەدى. 
كيىز ۇيدە وتكىزىلىپ جاتقان ۇيلەنۋ تويلارى ۇلىبريتانيا مەن كانادادا ۇلكەن سۇرانىستا. كيىز ءۇيدى جالعا الۋ قۇنى 3-5 مىڭ اعىلشىن فۋنت ستەرلينگى شاماسىندا. كوشپەندىلەردىڭ كولوريتىن تۇگەلدەي دەرلىك اعىلشىن تويلارىنا بەيىمدەۋ ۇيىمداستىرۋ اگەنتتىكتەرىنىڭ ماقساتى ەمەس. ولار تەك كيىز ءۇيدىڭ تۇپكى نەگىزى مەن كونسترۋكتسياسىن عانا العان. وسىلايشا ەجەلگى كوشپەندىلەردىڭ نەگىزگى باسپاناسى بولعان، قازاق حالقىنىڭ برەندى ىسپەتتى كيىز ءۇي، كۇللى الەم ارحيتەكتورلارى مەن ديزاينەرلەرىنىڭ ىقىلاسىن ارتتىرىپ وتىر.
Stan.kz
