قازاق-قىرعىز شەكاراسىنداعى "قورداي" اۆتوكولىك وتكىزۋ بەكەتى جوندەۋ جۇمىستارىنا بايلانىستى 20 اقپاننان باستاپ جابىلادى. جاڭعىرتۋ جۇمىستارى قاشان اياقتالاتىنى ازىرگە بەلگىسىز، دەپ حابارلايدى Sputnik قازاقستان ۇقك شەكارا قىزمەتىنىڭ ءباسپاسوز قىزمەتىنە سىلتەمە جاساپ.
"20 اقپاننان باستاپ قازاقستاندىق تاراپتان "قورداي", ال قىرعىزستاندىق تاراپتان "اق جول" وتكىزۋ بەكەتى جابىلادى. ول جەردە قايتا قالپىنا كەلتىرۋ جۇمىستارى جۇرگىزىلەدى. جوندەۋ جۇمىستارى قانشا ۋاقىتقا سوزىلاتىنى ازىرگە بەلگىسىز", - دەدى شەكارا قىزمەتى ءباسپاسوز قىزمەتىنىڭ باسشىسى قاناتبەك سۇلتانوۆ.
ەكى ەلدىڭ ازاماتتارىنا كۇن سايىن تاڭعى 06.00-دەن تۇنگى 00.00-گە دەيىن ءارى-بەرى جاياۋ وتۋگە رۇقسات ەتىلەدى. ولار تەك قول جۇگىن الىپ وتە الادى.
شەكارا قىزمەتى كولىكتەر مەن شەتەلدىكتەردى وتكىزۋ ءۇشىن قازاق-قىرعىز شەكاراسىنداعى باسقا وتكىزۋ پۋنكتەرىن پايدالانۋعا كەڭەس بەردى.
بۇعان دەيىن يندۋستريا جانە ينفراقۇرىلىمدىق دامۋ مينيسترلىگى قازاق-قىرعىز شەكاراسىنداعى "قورداي" وتكىزۋ بەكەتى 2020 جىلى تولىعىمەن جاڭعىرتىلاتىنىن حابارلاعان ەدى. جوندەۋ جۇمىستارىنان كەيىن "قوردايدا" ۇزىن-سونار كەزەك ازايىپ، قازاقستاندىقتار ءۇشىن شەكارادان ءوتۋ جەڭىلدەي تۇسپەك.
"قورداي" اۆتوكولىك وتكىزۋ بەكەتى جامبىل وبلىسى قورداي اۋدانى قورداي اۋىلدىق وكرۋگىنىڭ اۋماعىندا ورنالاسقان.
ايتا كەتسەك، قازىر ەكى ەل اراسىندا 11 اۆتوكولىك وتكىزۋ پۋنكتى بار. ولاردىڭ بەسەۋى – كوپجاقتى حالىقارالىق، ال التاۋى – ەكىجاقتى.
