ۇلتتىق مۋزەيدە قازاقتىڭ ۇلتتىق تاعامدارىن زەرتتەيتىن لابوراتوريا اشىلادى. بۇل جونىندە اكادەميك تورەگەلدى شارمانوۆپەن كەزدەسۋ بارىسىندا ۇلتتىق مۋزەي ديرەكتورى دارحان مىڭباي ايتتى، دەپ حابارلايدى قازاقستان رەسپۋبليكاسى ۇلتتىق مۋزەيىنىڭ اقپاراتتىق يميدجدىك قىزمەتى.
ۇلتتىق مۋزەيدە ۇيىمداستىرىلعان كەزدەسۋ كەزىندە قازاق تاعامتانۋ اكادەمياسىنىڭ پرەزيدەنتى، اكادەميك تورەگەلدى شارمانوۆ جىلقى شارۋاشىلىعى مەن قىمىز وندىرىسىنە ەرەكشە ءمان بەرەۋ كەرەكتىگىنە توقتالىپ ءوتتى.
«ءبارىمىزدىڭ ماقساتىمىز ءبىر ول – قازاقتىڭ تاريحىن، ۇلتتىق مادەنيەتىن، جان-جاقتى كورسەتۋ، ناسيحاتتاۋ، تانىستىرۋ. ءبىز ءوزىمىزدىڭ اتادان بالاعا جالعاسقان ۇلتتىق تاعامدارىمىزدىڭ ماڭىزىن ءتۇسىنۋىمىز قاجەت. ماسەلەن ءبىز جىلقىنىڭ قاسيەتىن، ونىڭ ماڭىزى مەن ارتىقشىلىقتارىن دۇرىس تۇسىنبەي ءجۇرمىز. جىلقى جايلى نە بىلەمىز؟ ونىڭ تەك ەتىن جەپ، قىمىزىن ءىشۋدى عانا بىلەمىز. بىراق، بيە سۇتىنەن قانشاما ءونىم جاساپ شىعارۋعا بولار ەدى، ونى ءبىز وسى ۋاقىتقا دەيىن جۇزەگە اسىرا الماي كەلگەنبىز. قازىر قازاقتىڭ تاعامتانۋ اكادەمياسى بيە سۇتىنەن بالمۇزداق، شوكولاد، تورت سياقتى ونىمدەر ءوندىرىپ جاتىر. ولار ادام اعزاسىنا پايدالى دارۋمەندەرگە باي. ءبىز قازىر جىلقىنى تەك قانا سويىپ جەپ جابايى تۇردە قۇرتىپ جاتىرمىز. قىمىز ادام دەنساۋلىعىنا وتە پايدالى، ول ادامنىڭ شارشاۋىن ۇمىتتىرىپ، كوڭىل-كۇيىن كوتەرەدى. قىمىزدىڭ قۇرامىندا ادامعا راحات سىيلايتىن دارۋمەندەر بار. ءتىپتى ورىس جازۋشىسى لەۆ تولستوي ايەلىمەن رەنجىسكەن كەزدە اپتالاپ، قىمىز ءىشىپ جاتاتىن بولعان. بيەنىڭ ءسۇتى تەرى اۋرۋلارىنا ەم. كەزىندە قىمىزدى كوپ ىشەتىن قازاقتاردىڭ اراسىندا تەرى اۋرۋ از بولعان»، - دەدى ت.شارمانوۆ.
تورەگەلدى شارمانوۆپەن كەزدەسۋگە قازاقستان رەسپۋبليكاسى ۇلتتىق مۋزەيىنىڭ عىلىمي قىزمەتكەرلەرى مەن عالىمدار، مۋزەي قىزمەتكەرلەرى قاتىستى. اكادەميك عىلىمي قىزمەتكەرلەردىڭ سۇراقتارىنا جاۋاپ بەردى.
«ۇلتتىق مۋزەي قازاقتىڭ بايىرعى ۇلتتىق تاعامدارىن زەرتتەپ، ونىڭ پايداسى مەن ارتىقشىلىقتارىن، حالىققا تۇسىندىرەتىن بولادى. بۇل ىسكە ت.شارمانوۆ باسقاراتىن قازاقتىڭ تاعامتانۋ اكادەمياسى كەڭەسشى بولاتىن بولدى» – دەدى د.مىڭباي.
ايتا وتەيىك، ۇلتتىق مۋزەيدە اشىلاتىن ۇلتتىق تاعامداردى زەرتتەيتىن لابوراتوريا مۋزەي جانىنداعى «حالىق قازىناسى» عىلىمي-زەرتتەۋ ينستيتۋتىنا قاراستى بولادى. جوباعا قازىرگى ۋاقىتتا ينستيتۋت جەتەكشىسى اقان وڭعار باسشىلىق ەتەدى.
نۇرسەرىك جولبارىس
