Ulttyq mýzeıde qazaqtyń ulttyq taǵamdaryn zertteıtin laboratorııa ashylady. Bul jóninde akademık Tóregeldi Sharmanovpen kezdesý barysynda Ulttyq mýzeı dırektory Darhan Myńbaı aıtty, dep habarlaıdy Qazaqstan Respýblıkasy Ulttyq mýzeıiniń aqparattyq ımıdjdik qyzmeti.
Ulttyq mýzeıde uıymdastyrylǵan kezdesý kezinde Qazaq taǵamtaný akademııasynyń prezıdenti, akademık Tóregeldi Sharmanov jylqy sharýashylyǵy men qymyz óndirisine erekshe mán bereý kerektigine toqtalyp ótti.
«Bárimizdiń maqsatymyz bir ol – qazaqtyń tarıhyn, ulttyq mádenıetin, jan-jaqty kórsetý, nasıhattaý, tanystyrý. Biz ózimizdiń atadan balaǵa jalǵasqan ulttyq taǵamdarymyzdyń mańyzyn túsinýimiz qajet. Máselen biz jylqynyń qasıetin, onyń mańyzy men artyqshylyqtaryn durys túsinbeı júrmiz. Jylqy jaıly ne bilemiz? Onyń tek etin jep, qymyzyn ishýdi ǵana bilemiz. Biraq, bıe sútinen qanshama ónim jasap shyǵarýǵa bolar edi, ony biz osy ýaqytqa deıin júzege asyra almaı kelgenbiz. Qazir Qazaqtyń taǵamtaný akademııasy bıe sútinen balmuzdaq, shokolad, tort sııaqty ónimder óndirip jatyr. Olar adam aǵzasyna paıdaly dárýmenderge baı. Biz qazir jylqyny tek qana soıyp jep jabaıy túrde qurtyp jatyrmyz. Qymyz adam densaýlyǵyna óte paıdaly, ol adamnyń sharshaýyn umyttyryp, kóńil-kúıin kóteredi. Qymyzdyń quramynda adamǵa rahat syılaıtyn dárýmender bar. Tipti orys jazýshysy Lev Tolstoı áıelimen renjisken kezde aptalap, qymyz iship jatatyn bolǵan. Bıeniń súti teri aýrýlaryna em. Kezinde qymyzdy kóp ishetin qazaqtardyń arasynda teri aýrý az bolǵan», - dedi T.Sharmanov.
Tóregeldi Sharmanovpen kezdesýge Qazaqstan Respýblıkasy Ulttyq mýzeıiniń ǵylymı qyzmetkerleri men ǵalymdar, mýzeı qyzmetkerleri qatysty. Akademık ǵylymı qyzmetkerlerdiń suraqtaryna jaýap berdi.
«Ulttyq mýzeı qazaqtyń baıyrǵy ulttyq taǵamdaryn zerttep, onyń paıdasy men artyqshylyqtaryn, halyqqa túsindiretin bolady. Bul iske T.Sharmanov basqaratyn Qazaqtyń taǵamtaný akademııasy keńesshi bolatyn boldy» – dedi D.Myńbaı.
Aıta óteıik, Ulttyq mýzeıde ashylatyn ulttyq taǵamdardy zertteıtin laboratorııa mýzeı janyndaǵy «Halyq qazynasy» ǵylymı-zertteý ınstıtýtyna qarasty bolady. Jobaǵa qazirgi ýaqytta ınstıtýt jetekshisi Aqan Ońǵar basshylyq etedi.
Nurserik JOLBARYS
