قازاقستان حالقى اسسامبلەياسى جامبىل وبلىسى، قورداي اۋدانىنداعى وقيعاعا قاتىستى رەسمي مالىمدەمە تاراتتى. اسسامبلەيا قازاقستاندىقتاردى اشۋعا بوي الدىرماۋعا شاقىردى.
قحا ماسانشى كەنتىندەگى قاقتىعىستا قازا بولعانداردىڭ وتباسى مەن جاقىندارىنا كوڭىل ايتتى جانە زارداپ شەككەندەردىڭ تەزىرەك ساۋىعىپ كەتۋىن تىلەدى. بۇعا قوسا اسسامبلەيا قازاقستاندىقتاردى قاقتىعىستىڭ سالدارىن جويۋعا باعىتتالعان كۇش-جىگەردى قولداۋعا، پرەزيدەنتتىڭ تاپسىرماسىن ورىنداۋعا جان-جاقتى قولداۋ كورسەتۋگە شاقىردى.
«اسسامبلەيا مۇشەلەرى بارلىق كىنالىلەر زاڭعا سايكەس انىقتالىپ، جازالانۋى كەرەك دەگەن ورتاق پىكىر ايتادى. سوندىقتان بۇگىنگى كۇننىڭ ەڭ ماڭىزدى مىندەتى - ارانداتۋشىلىققا بوي الدىرماۋ، جەكەلەگەن ادامدار جاساعان زاڭسىزدىقتار ءۇشىن بارلىق ۇلتتاردى ايىپتاۋعا جول بەرمەۋ كەرەك» دەلىنگەن مالىمدەمەدە.
اسسامبلەيا حالىقتىڭ دانالىعىنا سەنىم ءبىلدىرىپ، بىزدىڭ ازاماتتارىمىزدى، اسىرەسە جاستاردى ەلدەگى بەيبىتشىلىك پەن كەلىسىمدى بۇزاتىن جانە وزدەرىنە زيان كەلتىرەتىن ورەسكەل سوزدەر مەن ارەكەتتەردەن اۋلاق بولۋعا شاقىرادى.
«ءبىز قازاقستان حالقى ارقاشان ءبىر-بىرىمەن باۋىرلاستىق قاتىناستاردىڭ ۇلگىسى بولعان جانە بولا بەرەتىنىنە سەنىمدىمىز.بالالارىمىزدىڭ ورتاق بولاشاعى ءۇشىن ءبىز ەتنيكالىق ارازدىقتى قوزدىرۋعا جول بەرمەۋىمىز كەرەك. ءبىز ازاماتتاردى جالعان قاۋەسەتتەرگە بوي الدىرماۋعا، قوعامدىق قاۋىپسىزدىك پەن ادامداردىڭ تىنىشتىعىن قامتاماسىز ەتۋگە قۇقىق قورعاۋ ورگاندارىنا كومەكتەسۋگە، ەلىمىزدە بەيبىتشىلىك پەن تىنىشتىقتى ساقتاۋعا شاقىرامىز »، - دەلىنگەن حابارلامادا.
"ادىرنا" ۇلتتىق پورتالى
