«جەرگىلىكتى ورگاندار ونى قايتارۋدىڭ كەستەسىن جاسايدى. ال ەگەر ولاي بولماسا، وندا سوت ارقىلى ءوندىرىلىپ الىنادى».
30 قاڭتاردا نۇر-سۇلتاندا وتكەن ۇكىمەت پەن ءماجىلىس دەپۋتاتتارىنىڭ كەزدەسۋى كەزىندە ۆيتسە-پرەمەر بەردىبەك ساپارباەۆ 2019 جىلى اتاۋلى الەۋمەتتىك كومەك العان 75 مىڭداي وتباسى تابىسىن جاسىرعان دەپ مالىمدەدى.
«وكىنىشكە قاراي، بىلتىر وسىنداي جاعدايلار بولدى. ءبىز بارلىعىن تەكسەردىك. 75 مىڭ وتباسى تابىسىن جاسىرعان. قازىرگى تاڭدا 400-500 ملن تەڭگەنى بيۋدجەتكە قايتاردىق. قازىر ءبىز بىلاي ايتىپ جاتىرمىز. ەگەر سول وتباسى ءوز ەركىمەن قايتارسا، ماسەلە جوق. جەرگىلىكتى ورگاندار ونى قايتارۋدىڭ كەستەسىن جاسايدى. ال ەگەر ولاي بولماسا، وندا سوت ارقىلى ءوندىرىلىپ الىنادى»، - دەدى ساپارباەۆ.
بىلتىر ەڭبەك جانە حالىقتى الەۋمەتتىك قورعاۋ مينيسترلىگى 70 مىڭ وتباسى اتاۋلى كومەك الۋ ءۇشىن تابىسىن جاسىرعان، 200-گە تارتا قىزمەتكەر جاۋاپكەرشىلىككە تارتىلدى دەپ مالىمدەگەن.
اقپارات قۇرالدارىندا جاريالانعان دەرەك بويىنشا، اتاۋلى الەۋمەتتىك كومەكتى قايتارۋ تۋرالى تالاپ كوپ بالالى انالاردىڭ نارازىلىعىن تۋعىزعان. ولاردىڭ ايتۋىنشا، كەيبىر كەزدە جەرگىلىكتى ورگاندار جاردەماقىنى تاعايىنداۋ-تاعايىنداماۋ ماسەلەسىن شەشكەن كەزدە، ءتىپتى، از اقشانىڭ ءوزىن ەسەپكە العان.
وتكەن جىلدىڭ سوڭىندا جەرگىلىكتى باق وتباسىنىڭ تابىس كولەمى كەدەيلىك شەگىنەن 104 تەڭگەگە اسىپ كەتكەنى ءۇشىن اتاۋلى الەۋمەتتىك كومەك رەتىندە تولەنگەن اقشانى قايتارۋعا مىندەتتەلگەن، اقمولا وبلىسى، زەرەندى اۋدانىندا تۇراتىن كوپبالالى اكەنىڭ جۇمىسپەن قامتۋ ورتالىعىنا اتاۋلى الەۋمەتتىك كومەك اقشاسىنا ساتىپ العان زاتتاردى اپارىپ بەرگەنىن جازدى.
بيىل اقپاندا نۇر-سۇلتاندا ۋاقىتشا باسپانادا شىققان ورتتەن ءبىر وتباسىنىڭ بەس قىزى قازا تاپقان. وسىدان كەيىن ەلدە كوپ بالالى ايەلدەردىڭ نارازىلىعى كۇشەيىپ، ولار بيلىكتەن جاردەماقىنى ءوسىرۋدى تالاپ ەتكەن. وسىدان سوڭ ۇكىمەت تۇرمىسى تومەن وتباسىلارعا اتاۋلى الەۋمەتتىك كومەكتى كوبەيتكەن. جاڭا جىلدان باستاپ ۇكىمەت كوپ بالالى انالارعا جاڭا جۇيە بويىنشا جاردەماقى تولەي باستاعان.
2020 جىلدىڭ 28 قاڭتار كۇنگى جاعداي بويىنشا، 80,5 مىڭ وتباسىنان (412,9 مىڭ ادام، ولاردىڭ 265,6 مىڭى – بالا) اتاۋلى الەۋمەتتىك كومەك تاعايىنداۋ تۋرالى ءوتىنىش تۇسكەن. ولاردىڭ 24 مىڭىنا ااك تاعايىندالعان.
"ازاتتىق" راديوسى
