قازاقستان قىتايمەن اراداعى شەكارانى نەگە جاپپاي وتىر؟

سىرتقى ىستەر مينيسترلىگى كوروناۆيرۋسقا بايلانىستى قىتايمەن اراداعى شەكارانى جابۋ ءتارتىبىن ءتۇسىندىردى، دەپ حابارلايدى Sputnik قازاقستان.

ءمينيستردىڭ ءبىرىنشى ورىنباسارى شاحرات نۇرىشەۆتىڭ ايتۋىنشا، قازاقستان قىتايمەن اراداعى شەكارانى جابۋدى جوسپارلاپ وتىرعان جوق. ول ءۇشىن دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسى قاجەت. الايدا كوروناۆيرۋسقا بايلانىستى قىتايلىق ازاماتتارعا قازاقستاننىڭ ۆيزاسىن بەرۋ تالاپتارى كۇشەيتىلدى.

"قازىرگى كەزدە ءبىزدىڭ قحر-داعى ەلشىلىگىمىز بەن باس كونسۋلدىعىمىز وسى ەلدىڭ ازاماتتارىنا دەنساۋلىق تۋرالى انىقتاما جاعىنان ۆيزا بەرۋ تالاپتارىن كۇشەيتتى. بۇدان بولەك، قىتاي ازاماتتارى ءۇشىن اۋەجايدا ەلەكتروندى ۆيزا راسىمدەۋ جۇمىسى توقتاتىلدى", - دەدى نۇرىشەۆ ۇكىمەتتە وتكەن ءباسپاسوز ءماسليحاتىندا.

ونىڭ سوزىنە قاراعاندا، قىتايمەن اراداعى شەكارا جابىلسا، قازاقستان ازاماتتارىن ەلگە قايتارۋ مۇمكىن بولمايدى.

"قازىرگى مالىمەتكە سايكەس، قحر تەرريتورياسىندا 1 300 قازاقستان ازاماتى بار. ولاردىڭ ىشىندە 635 تۋريست حاينان پروۆينتسياسىندا ءجۇر. بۇدان بولەك، ەلشىلىك، باس كونسۋلدىق قىزمەتكەرلەرى جانە ولاردىڭ وتباسى مۇشەلەرى بار", - دەپ اتاپ كورسەتتى نۇرىشەۆ.

قىتايداعى كوروناۆيرۋس

قىتايدا 2019 جىلدىڭ جەلتوقسانىنان باستاپ بەلگىسىز كوروناۆيرۋستىڭ تارالۋىنا بايلانىستى ەل بيلىگى حۋبەي پروۆينتسياسىنداعى ون قالانى "جاۋىپ" تاستادى.

ءبىرىنشى بولىپ ۋحان قالاسى جابىلدى. سەبەبى قاۋىپتى ىندەت 11 ميلليوننان استام تۇرعىنى بار وسى قالادان تاراعان بولاتىن.

كارانتين جاريالانعان قالالار اراسىندا چيبي (534 مىڭ ادام), ەچجوۋ (1,08 ميلليون ادام), حۋانگان (7,5 ميلليون ادام), سيانتاو (1,6 ميلليون ادام), چجيتسزيان (550 مىڭ ادام), تسيانتسزيان (963 مىڭ ادام), حۋانشي (2,7 ميلليون ادام), ەنشي (809 مىڭ ادام) مەن سياننين (2,5 ميلليون ادام) بار.

بۇگىنگى جاعداي بويىنشا، قىتايدا كوروناۆيرۋستان 106 ادام كوز جۇمدى. بۇعان قوسا، بۇل اۋرۋ باسقا ەلدەرگە دە تاراي باستاعان.