قىتاي "كورونوۆيرۋستىڭ وشاعى" دەپ ەسەپتەيتىن ەكى قالاسىن جاپتى. سوڭعى دەرەك بويىنشا، 600-دەن استام ادام ۆيرۋستى جۇقتىرعان. 17 ادام كوز جۇمدى.
23 قاڭتاردا دۇنيەجۇزىلىك دەنساۋلىق ساقتاۋ ۇيىمى (ددسۇ) قىتايدا ينفەكتسيانىڭ تارالۋىنا بايلانىستى دەنساۋلىق ساقتاۋ سالاسىندا توتەنشە جاعداي جاريالاۋدان باس تارتتى. ددسۇ-نىڭ باسشىسى تەدروس ادزحنوم گەبرەيەسۋستىڭ ايتۋىنشا، مۇنداي شەشىم قابىلداۋ ءۇشىن ءالى كوپ دەرەك جيناقتالۋى ءتيىس. بىراق ول شۇعىل شاقىرىلعان كوميتەت مۇشەلەرى اراسىندا بۇعان بايلانىستى قاراما-قايشى پىكىر بار ەكەنىن راستادى. جۇما كۇنى دە تالقىلاۋ جالعاسادى.
وتكەن جىلدىڭ سوڭىندا 11 ميلليون تۇرعىنى بار قىتايدىڭ ورتالىق بولىگىندەگى ۋحان قالاسىندا بەلگىسىز ۆيرۋس تابىلعان. 23 قاڭتاردا تاڭەرتەڭ قالانىڭ باسىم بولىگىندە قوعامدىق كولىك توقتاپ، ادامدارعا قالادان كەتپەۋگە بۇيىردى.
"11 ميلليون ادامدى وڭاشالاۋ - دەنساۋلىق ساقتاۋ سالاسى تاريحىندا بۇرىن-سوڭدى بولماعان نارسە. ددسۇ بۇلاي جاساۋعا كەڭەس بەرگەن جوق" دەدى ددسۇ-نىڭ پەكيندەگى وكىلى گاۋدەن گالەا.
بەيسەنبى كۇنى كورشى حۋانگەن قالاسى دا جابىلدى. مۇندا شامامەن جەتى ميلليون ادام تۇرادى.
ۆيرۋستىڭ تارالۋىنا بايلانىستى پەكيندە قىتايلىق جاڭا جىلدى تويلاۋ شاراسى شەگەرىلدى. دەنساۋلىق ساقتاۋ سالاسىنىڭ وكىلدەرى ۆيرۋس بۇدان دا تەز تارالىپ كەتۋى مۇمكىن دەپ قاۋىپتەنەدى - جاڭا جىل قارساڭىندا جانە مەرەكە كۇنى (25 قاڭتار) جۇزدەگەن ادام ەل اۋماعىندا جانە قىتايدان تىس جەرگە ساياحاتتاۋدى جوسپارلاپ وتىر.
"ازاتتىق" راديوسى
