Qytaı "koronovırýstyń oshaǵy" dep esepteıtin eki qalasyn japty. Sońǵy derek boıynsha, 600-den astam adam vırýsty juqtyrǵan. 17 adam kóz jumdy.
23 qańtarda Dúnıejúzilik densaýlyq saqtaý uıymy (DDSU) Qytaıda ınfekııanyń taralýyna baılanysty densaýlyq saqtaý salasynda tótenshe jaǵdaı jarııalaýdan bas tartty. DDSU-nyń basshysy Tedros Adzhnom Gebreıesýstyń aıtýynsha, mundaı sheshim qabyldaý úshin áli kóp derek jınaqtalýy tıis. Biraq ol shuǵyl shaqyrylǵan komıtet músheleri arasynda buǵan baılanysty qarama-qaıshy pikir bar ekenin rastady. Juma kúni de talqylaý jalǵasady.
Ótken jyldyń sońynda 11 mıllıon turǵyny bar Qytaıdyń ortalyq bóligindegi Ýhan qalasynda belgisiz vırýs tabylǵan. 23 qańtarda tańerteń qalanyń basym bóliginde qoǵamdyq kólik toqtap, adamdarǵa qaladan ketpeýge buıyrdy.
"11 mıllıon adamdy ońashalaý - densaýlyq saqtaý salasy tarıhynda buryn-sońdy bolmaǵan nárse. DDSU bulaı jasaýǵa keńes bergen joq" dedi DDSU-nyń Pekındegi ókili Gaýden Galea.
Beısenbi kúni kórshi Hýangen qalasy da jabyldy. Munda shamamen jeti mıllıon adam turady.
Vırýstyń taralýyna baılanysty Pekınde qytaılyq Jańa jyldy toılaý sharasy shegerildi. Densaýlyq saqtaý salasynyń ókilderi vırýs budan da tez taralyp ketýi múmkin dep qaýiptenedi - jańa jyl qarsańynda jáne mereke kúni (25 qańtar) júzdegen adam el aýmaǵynda jáne Qytaıdan tys jerge saıahattaýdy josparlap otyr.
"Azattyq" radıosy
