شىعىس قازاقستان وبلىسى زايسان اۋداندىق سوتىندا "مەملەكەتتىك شەكارانى زاڭسىز كەسىپ ءوتتى" دەپ ايىپتالعان ەتنيكالىق ەكى قازاق قاستەر مۇساحانۇلى مەن مۇراگەر ءالىمۇلىنا ۇكىم وقىلدى. سۋديا وسپانوۆا قاستەر مۇساحانۇلى مەن مۇراگەر ءالىمۇلىن ارقايسىسىن ءبىر جىلعا باس بوستاندىعىنان ايىرىپ، جازاسىن قاۋىپسىزدىگى تومەن مەكەمەدە وتەيتىنىن ايتتى. بۇعان قوسا، ولاردىڭ ارقايسىسىنا 25 250 تەڭگە كولەمىندە ايىپپۇل سالدى.
"جازاسىن قاۋىپسىزىدىگى تومەن مەكەمەدە وتەيتىن بولعاندىقتان جازا وتەۋشىلەردىڭ ول مەكەمەدە وتەتىن ءبىر كۇنى ەكى كۇن بولىپ ەسەپتەلەدى. قاستەر مەن مۇراگەر جازالارىن بارىنشا قاۋىپسىزدىگى تومەن مەكەمەدە وتكىزەدى. ولارعا وزدەرىنىڭ تۋعان تۋىستارىمەن كەزدەسۋگە تولىق مۇمكىنشىلىك بار. بۇگىنگى كۇنگە دەيىن ولار 2019 جىلدىڭ 18 قازانىنان باستاپ قاماۋدا جاتقاندىقتان ولاردىڭ 3 اي 3 كۇنى، 6 اي 6 كۇن بولىپ ەسەپتەلەدى. سوندا ولار ەندى قاۋىپسىزدىگى تومەن مەكەمەدە 5 اي 24 كۇن جازاسىن وتەيدى",-دەدى سۋديا وسپانوۆا.
سوت زالىنان "ادىرنا" ۇلتتىق پورتالىنىڭ رەداكتورى وڭعار قابدەن تىكەلەي ەفيردەن حابار تارتتى:
ەسكە سالايىق، سوت بارىسىندا پروكۋرور "شەكارانى زاڭسىز كەسىپ ءوتتى" دەپ ايىپتالعان شىڭجاڭ قازاقتارى قاستەر مەن مۇراگەردىڭ ارقايسىسىن ءبىر جىلعا سوتتاۋدى سۇراعان بولاتىن. مەملەكەتتىك ايىپتاۋشى دا "جەڭىلدەتىلگەن ءمان-جايلاردى ەسكەرىپ" ولاردى قىتايعا قايتارماۋدى وتىنگەن ەدى.
بۇگىنگى سوتقا قاراعاندى، شىمكەنت، الماتى تاعى باسقا ايماقتاردان قاستەر مەن مۇراگەردى قولداپ، كوپ ادام كەلدى. سوت زالىنا سىيماعان حالىق ەكى ازاماتتى سىرتتا قولداپ تۇردى.
2019 جىلى قازان ايىندا قىتايدىڭ شىڭجاڭ ولكەسىندە تۋىپ وسكەن ەتنيكالىق قازاقتار قاستەر مەن مۇراگەردىڭ قازاقستانعا "شەكارانى زاڭسىز كەسىپ وتكەنى" تۋرالى اقپارات تاراعان.
قازاقستان بيلىگىنەن بوسقىن مارتەبەسىن سۇراعان قىتايدىڭ ەكى ازاماتىنا قازان ايىنىڭ سوڭىندا "پانا ىزدەۋشى تۇلعا" كۋالىگى بەرىلگەن ەدى.
قاستەر مەن مۇراگەردىڭ ءىسى بويىنشا سوت 6 قاڭتاردا باستالعان. بۇعان دەيىن ادۆوكات ءلاززات احاتوۆا شىڭجاڭدا قالعان ولاردىڭ تۋىستارىنا دا قىتاي بيلىگى قىسىم جاساعانىن ايتقان.
بۇعان دەيىن دە بەلسەندىلەر ەكى ازاماتتى قىتايعا قايتارماۋدى تالاپ ەتكەن بولاتىن.
"ادىرنا" ۇلتتىق پورتالى
