ەكى ەتنيكالىق قازاقتىڭ قازاقستانعا شەكارا اسىپ، پانا ىزدەپ كەلگەنىن ايتقان بەلسەندى شىمكەنتباي بورتەباي "قازاقستان بيلىگى ولاردى اقتاپ بوستاندىققا شىعارىپ، ساياسي باسپانا بەرۋگە مۇددەلى بولۋى كەرەك" دەدى. ونىڭ ءسوزىن جالعاعان لەسبەك بايجانوۆ "قازاقستان بارلىق قازاققا ورتاق مەكەن" دەدى. ونىڭ سوزىنشە، سوتى زايسان قالاسىندا ءوتىپ جاتقان قاستەر مۇساحانۇلى مەن مۇراگەر ءالىمۇلى قازاقستانعا تەڭدىك تابۋ ءۇشىن كەلگەن.
- الەمدەگى ءاربىر قازاق - ءبىزدىڭ باۋىرىمىز. قازاقستاننىڭ ءار ايماعىنان زايسانداعى سوتقا بارىپ، قولداۋ كورسەتىپ جاتىر. وسىلاي بولۋى كەرەك، - دەيدى ول.
بەلسەندىلەر جەكە-جەكە پىكىرىن ايتقان سوڭ "ەلىنەن اراشا سۇراپ كەلگەن ەكى قازاققا بوستاندىق بەرىلۋىن تالاپ ەتەمىز!" دەپ ايقايلادى. وقيعا بولعان ماڭدا پوليتسيا قىزمەتكەرلەرى بايقالمادى. شامامەن جارتى ساعاتتان كەيىن بەلسەندىلەر ۇيلەرىنە تاراستى.
قازاقستان مەن قىتاي "شەكاراسىن زاڭسىز كەسىپ ءوتتى" دەپ ايىپتالعان شىڭجاڭ قازاقتارى قاستەر مۇساحانۇلى مەن مۇراگەر ءالىمۇلىنىڭ ءىسى بويىنشا سوت ۇكىمى 21 قاڭتاردا 16:00-دە زايسان سوتىندا وقىلادى. سەيسەنبى كۇنى تاڭەرتەڭ سوتتا ەكى كۋاگەر سۇرالىپ، ىزىنشە ءجارىسسوز وتكەن.
ءجارىسسوز كەزىندە مەملەكەتتىك ايىپتاۋشى ەكى جىگىتتىڭ ارقايسىسىن ءبىر جىلعا باس بوستاندىعىنان ايىرۋدى سۇراپ، 10 اەك كولەمىندە ايىپپۇل سالۋدى سۇرادى. پروكۋرور "جەڭىلدەتىلگەن جاعدايدى ەسكەرىپ" ولاردى قازاقستاننان شىعارماۋدى ءوتىندى.
ال قورعاۋ تارابى ەكى ازاماتتىڭ قىتايداعى قىسىمعا بايلانىستى "شەكارادان زاڭسىز وتۋگە" ءماجبۇر بولعانىن، ولاردى قىلمىستىق جاۋاپكەرشىلىكتەن تولىق بوساتۋدى سۇرادى.
"ازاتتىق" راديوسى
