Ekı etnikalyq qazaqtyŋ Qazaqstanǧa şekara asyp, pana ızdep kelgenın aitqan belsendı Şymkentbai Börtebai "Qazaqstan bilıgı olardy aqtap bostandyqqa şyǧaryp, saiasi baspana beruge müddelı boluy kerek" dedı. Onyŋ sözın jalǧaǧan Lesbek Baijanov "Qazaqstan barlyq qazaqqa ortaq meken" dedı. Onyŋ sözınşe, soty Zaisan qalasynda ötıp jatqan Qaster Mūsahanūly men Mūrager Älımūly Qazaqstanǧa teŋdık tabu üşın kelgen.
- Älemdegı ärbır qazaq - bızdıŋ bauyrymyz. Qazaqstannyŋ är aimaǧynan Zaisandaǧy sotqa baryp, qoldau körsetıp jatyr. Osylai boluy kerek, - deidı ol.
Belsendıler jeke-jeke pıkırın aitqan soŋ "Elınen araşa sūrap kelgen ekı qazaqqa bostandyq berıluın talap etemız!" dep aiqailady. Oqiǧa bolǧan maŋda polisiia qyzmetkerlerı baiqalmady. Şamamen jarty saǧattan keiın belsendıler üilerıne tarasty.
Qazaqstan men Qytai "şekarasyn zaŋsyz kesıp öttı" dep aiyptalǧan Şyŋjaŋ qazaqtary Qaster Mūsahanūly men Mūrager Älımūlynyŋ ısı boiynşa sot ükımı 21 qaŋtarda 16:00-de Zaisan sotynda oqylady. Seisenbı künı taŋerteŋ sotta ekı kuäger sūralyp, ızınşe jaryssöz ötken.
Jaryssöz kezınde memlekettık aiyptauşy ekı jıgıttıŋ ärqaisysyn bır jylǧa bas bostandyǧynan aiyrudy sūrap, 10 AEK kölemınde aiyppūl saludy sūrady. Prokuror "jeŋıldetılgen jaǧdaidy eskerıp" olardy Qazaqstannan şyǧarmaudy ötındı.
Al qorǧau taraby ekı azamattyŋ Qytaidaǧy qysymǧa bailanysty "şekaradan zaŋsyz ötuge" mäjbür bolǧanyn, olardy qylmystyq jauapkerşılıkten tolyq bosatudy sūrady.
"Azattyq" radiosy
