Eki etnıkalyq qazaqtyń Qazaqstanǵa shekara asyp, pana izdep kelgenin aıtqan belsendi Shymkentbaı Bórtebaı "Qazaqstan bıligi olardy aqtap bostandyqqa shyǵaryp, saıası baspana berýge múddeli bolýy kerek" dedi. Onyń sózin jalǵaǵan Lesbek Baıjanov "Qazaqstan barlyq qazaqqa ortaq meken" dedi. Onyń sózinshe, soty Zaısan qalasynda ótip jatqan Qaster Musahanuly men Murager Álimuly Qazaqstanǵa teńdik tabý úshin kelgen.
- Álemdegi árbir qazaq - bizdiń baýyrymyz. Qazaqstannyń ár aımaǵynan Zaısandaǵy sotqa baryp, qoldaý kórsetip jatyr. Osylaı bolýy kerek, - deıdi ol.
Belsendiler jeke-jeke pikirin aıtqan soń "Elinen arasha surap kelgen eki qazaqqa bostandyq berilýin talap etemiz!" dep aıqaılady. Oqıǵa bolǵan mańda polıııa qyzmetkerleri baıqalmady. Shamamen jarty saǵattan keıin belsendiler úılerine tarasty.
Qazaqstan men Qytaı "shekarasyn zańsyz kesip ótti" dep aıyptalǵan Shyńjań qazaqtary Qaster Musahanuly men Murager Álimulynyń isi boıynsha sot úkimi 21 qańtarda 16:00-de Zaısan sotynda oqylady. Seısenbi kúni tańerteń sotta eki kýáger suralyp, izinshe jaryssóz ótken.
Jaryssóz kezinde memlekettik aıyptaýshy eki jigittiń árqaısysyn bir jylǵa bas bostandyǵynan aıyrýdy surap, 10 AEK kóleminde aıyppul salýdy surady. Prokýror "jeńildetilgen jaǵdaıdy eskerip" olardy Qazaqstannan shyǵarmaýdy ótindi.
Al qorǵaý taraby eki azamattyń Qytaıdaǵy qysymǵa baılanysty "shekaradan zańsyz ótýge" májbúr bolǵanyn, olardy qylmystyq jaýapkershilikten tolyq bosatýdy surady.
"Azattyq" radıosy
