قازىر ءبىزدىڭ ەلدە كوپ بالالى انالاردىڭ پروبلەماسى قويۋلانىپ تۇر. بىلتىردان بەرى ۇكىمەت ءار بالاسىنا 21 مىڭ تەڭگە تولەپ كوپ بالالى انالاردىڭ كوڭىلىن اۋلاعانداي بولىپ ەدى. ەندى بيىل جاڭا جاردەماقى تولەۋ تەتىگى ىسكە قوسىلىپ، جاردەماقى كولەمى بىرشاماعا ازايىپ قالدى.
وعان سەبەپ 2020 جىلدىڭ 1 قاڭتارىنان باستاپ كوپبالالى وتباسىلارعا مەملەكەتتىك جاردەماقىنى تابىسىنا قاراماي تولەۋدى ۇسىندى. بۇل ءۇشىن كوپبالالى وتباسىلاردى اتاۋلى الەۋمەتتىك كومەك الاتىنداردىڭ قاتارىنان شىعارۋ قاجەت ەكەن. «ءبىز كوپبالالى انالاردىڭ مارتەبەسىن كوتەرىپ، ءال-اۋقاتىن جاقسارتۋدى كوزدەپ وتىرمىز. مەملەكەتتىك جاردەماقىنىڭ جاڭا ءتۇرى 42 500 تەڭگەدەن 73 370 تەڭگەگە دەيىن سارالانعان مولشەردە تاعايىندالادى»، – دەدى ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ.
ەسەپتەسەك، بۇعان دەيىن ەلدە ءتورت بالاسى بار انا ءار بالاعا 21 مىڭ تەڭگەدەن ەسەپتەگەندە 84,000 تەڭگەدەن اسىرىپ جاردەماقى الىپ جۇرسە، ەندىگى كەزەكتە ءتورت بالالى انا 42,500 تەڭگە الاتىن بولىپ وتىر. بۇعان كوڭىلى تولمايتىن بىرقاتار انالار نارازىلىعىن ءبىلدىرىپ تە جاتىر. سولاردىڭ ءبىرى الماتى وبلىسى، قاراساي اۋدانىنىڭ تۇرعىنى باقىتجامال كۇلدەروۆا «جاردەماقىمىز ەكى ەسەگە ازاياتىن بولدى. جەتپەيتىن تىرلىك. ءتورت بالاعا شىنداپ كەلگەندە 100 مىڭ تەڭگە دە جەتپەيدى. ەندى بالا تاپپايمىن. نەسىن جاسىرامىز، شىنداپ كەلگەندە ءبىزدىڭ الاتىن جاردەماقى بالانىڭ جايالىعىنا دا جەتپەيدى » دەيدى اشىنىپ.
ال وسى ارالىقتا رەسەي ەلىندە انالارعا بەرىلەتىن بىررەتتىك «انا كاپيتالى» 2020 جىدان باستاپ وسىرىلەتىن بولدى. بۇعان دەيىن رەسەيدە ەكىنشى بالانى اكەلگەندە عانا انا كاپيتالى بەرىلەتىن بولسا، ەندى ءبىرىنشى بالانى اكەلگەن ساتتەن باستاپ رەسەي "انا كاپيتالىن" تاعايىندايتىن بولدى. رەسەيدەگى ايەلدەردىڭ ۇكىمەتىنەن الاتىن بىررەتتىك «انا كاپيتالى» 453026 رۋبل بولسا، بۇل سوما 2020 جىلى 470241 رۋبل بولىپ وسەتىن بولدى. (تەڭگەگە شاعىپ كورسەڭىز قوماقتى سوما)
سول ءتارىزدى جاپونيا ۇكىمەتى دە «بالا كاپيتالىن» 2020 جىلدان باستاپ وسىرەتىندىكتەرىن ءمالىم ەتتى. ەندى 2020 جىلدان باستاپ جاپونداردىڭ ەكىنشى بالانى ومىرگە اكەلگەن انالارى اي سايىن جاردەماقى رەتىندە 500 ەۆرو جالاقى الىپ وتىراتىن بولدى.
رەسەي ەلى 2020 جىلى زەينەتاقى قورىنان جاعدايى تومەن انالاردىڭ الەۋمەتتىك جاعدايىن شەشۋ ماقساتىندا تاعى دا قارجى بولەتىن بولدى. بۇعان دەيىن كورشى ەل انالارىنىڭ جوق-جىتىگىن تۇگەندەۋ ماقساتىندا زەينەتاقى قورىنان 2017 جىلى 312 ملرد رۋبل، 2018 جىلى 325 ملرد رۋبل بولگەن بولاتىن.
ەكونوميست-ساراپشى داۋرەن ارىننىڭ ايتۋىنشا، قازىر كوپ بالالى انالاردى مەملەكەتتىك سۋبسيديامەن قامتۋ وزەكتى بولىپ وتىر. ساراپشى مامان بۇل رەتتە بىرقاتار ەلدەردىڭ تاجىريبەسىن مىسال ەتتى. تاعى سول، كورشى رەسەيدە، وزبەكستاندا، قىرعىزستاندا بانكتەردىڭ مۇنداي باعىتتا جۇمىس ىستەيتىن ارنايى بولىمدەرى دە بار كورىنەدى. «كورشى رەسەيدى مىسالعا الساق، رەسەيدىڭ ورتالىق بانكى 2017 جىلدان بەرى كوپ بالالى انالارىن سۋبسيديامەن قامتۋ ارقىلى، انالاردى شاعىن بيزنەسكە تارتۋ، ولاردىڭ كاسىپكەرلىك ءبىلىمىن جەتىلدىرۋ، اگروبيزنەستى وركەندەتۋىنە ۇلەس قوسۋ دەيسىز بە، تولىپ جاتقان مۇمكىندىكتەر ۇسىنىپ وتىر. وسىعان وراي رەسەيدە قازىر كوپ بالالى انالاردىڭ 60 پايىزدان استامى اۋىلدىق ايماقتاردا ءوز بيزنەسىن جۇرگىزۋگە ماشىقتانىپ العان. بۇعان قوسا رەسەيدە 3 بالاسى بار انالارعا ماسكەۋدەن ءۇي الۋ ءۇشىن 6,1 %-بەن ارنايى جەڭىلدىكتەر قاراستىرىلعان. وسىلاي ارزان نەسيە بەرۋ ارقىلى ولار كوپ بالالى انالاردى باسپانەمەن قامتۋ جاعىن جۇيەلى جولعا قويىپ الدى. سول ءتارىزدى 6,2 %-بەن اۋىلدىق ايماقتاردا بيزنەس جۇرگىزىپ، باسپانا الۋ ءۇشىن دە ارزان سۋبسيديالار بەرىلەدى. كورشى ەلدىڭ كوپ بالالى انالارىنىڭ جارتىسىنان كوبى وسى اۋىلدىق-ايماققا ورنىعىپ بيزنەس جۇرگىزۋ جوباسىن قاتتى قولداپ وتىر. وسىعان قاراپ قازاقستانعا دا ناقتى-ناقتى شارالاردى قاراستىرۋ كەرەكتىگىن پايىمدايسىڭ. ولاي ەتپەسەك، ءبىز كوپ بالالى انالاردىڭ ەڭسەسىن تىكتەي المايمىز. جالپى، اناعا جاعداي جاساي ول بولاشاققا جاعداي جاساۋ كەرەكەكەنىن ۇمىتپاۋ كەرەك. ەگەر قازاق ايەلى ۇرپاق كوبەيتسىن دەسەك، ءبىرىنشى كەزەكتە ونىڭ الەۋمەتتىك جاعدايىن دۇرىستاعان ءجون»، - دەدى ەكونوميست-ساراپشى داۋرەن ارىن
قارلىعاش زارىققانقىزى،
"ادىرنا" ۇلتتىق پورتالى
