قىتاي سوتى اقجارقىن تۇرلىبايعا قاتىستى ۇكىم شىعاردى

 قىتاي سوتى وتانداسىمىز اقجارقىن تۇرلىبايعا قاتىستى سوت شەشىمىن وزگەرىسسىز قالدىردى، دەپ حابارلايدى Sputnik قازاقستان سىرتقى ىستەر مينيسترلىگىنىڭ ءباسپاسوز قىزمەتىنە سىلتەمە جاساپ.

ۆەدومستۆونىڭ اقپاراتىنشا، بۇگىن قىتايدىڭ گۋانچجوۋ سوتىندا ەسىرتكى تاسىمالداعانى ءۇشىن ايىپتالعان قازاقستان ازاماتى اقجارقىن تۇرلىبايعا قاتىستى سوت ۇكىمى شىقتى.

"قىتاي سوتى ءومىر بويى باس بوستاندىعىنان ايىرۋ تۋرالى ۇكىمدى وزگەرىسسىز قالدىردى", - دەلىنگەن حابارلامادا.

ۇكىم 10 كۇننەن سوڭ كۇشىنە ەنەدى.

سوت وتىرىسىنا ادۆوكاتتار مەن قازاقستاننىڭ قىتايداعى ەلشىلىگىنىڭ كونسۋلى قاتىسقان.

اقجارقىن تۇرلىبايدىڭ تاعدىرى

قازاقستان ازاماتى اقجارقىن تۇرلىباي 2014 جىلى ناۋرىزدا گۋانچجوۋ اۋەجايىندا ۇستالعان بولاتىن. وعان شەكارادان 4,5 كەلى ەسىرتكىنى الىپ وتپەك بولدى دەگەن ايىپ تاعىلدى. ول كەزدە وتانداسىمىز 20 جاستا بولعان ەدى. 2015 جىلدىڭ ماۋسىمىندا قىتاي سوتى ونى ءومىر بويىنا باس بوستاندىعىنان ايىردى. سوتتا اقجارقىن شەتەلدىك دوسى الداپ كەتكەنىن ايتىپ، كىناسىن مويىنداعان جوق.

2016 جىلى سوت شەشىمى جويىلىپ، ءىس قايتا قاراۋعا جىبەرىلدى.

وسى جىلدىڭ قىركۇيەگىندە تۇرلىبايدىڭ اناسى زۋحرا سەيتىموۆا قازاقستان پرەزيدەنتىنە كومەك سۇراپ حات جازدى. ارتىنشا قاسىم-جومارت توقاەۆ قىتايعا ساپارى كەزىندە اقجارقىن تۇرلىبايدىڭ ماسەلەسىن كوتەرگەن بولاتىن.

اقجارقىن تۇرمەدە نەمەن اينالىسادى

قازاقستاننىڭ قىتايداعى ەلشىلىگىنىڭ مالىمەتىنە سۇيەنسەك، تۇرلىباي قاسىنداعى سوتتالعاندارعا اعىلشىن ءتىلىن ۇيرەتىپ ءجۇر. سونىمەن قاتار، كوركەم ادەبيەت وقيدى، دەنە شىنىقتىرۋمەن دە اينالىسادى. قىتاي ءتىلىن جاقسى مەڭگەرىپ العان.