نۇر-سۇلتان. قازاقپارات - قر مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا پرەزيدەنتتىك جاستار كادر رەزەرۆىنە ەنگەن قازاقستاندىقتار تۋرالى ايتىپ بەردى، دەپ حابارلايدى قازاقپارات ءتىلشىسى.
«مەملەكەت باسشىسى قاسىم-جومارت توقاەۆتىڭ «يگىلىك بارشاعا! ساباقتاستىق. ادىلدىك. ورلەۋ» سايلاۋالدى باعدارلاماسىندا اگەنتتىكتىڭ الدىنا پرەزيدەنتتىك جاستار كادر رەزەرۆىن قالىپتاستىرۋ مىندەتى قويىلدى. بۇگىن ءبىز پرەزيدەنتتىك جاستار كادر رەزەرۆىنە ىرىكتەۋدىڭ اياقتالعانىن قۋانىشپەن حابارلايمىز»، - دەدى انار جايىلعانوۆا قر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
پرەزيدەنت باستاماسىنا العاشىندا 13 مىڭنان استام قازاقستاندىق قاتىسۋعا نيەت بىلدىرگەن ەدى. قاتىسۋشىلارعا وتىز بەس جاستان اسپاعان، جوعارى ءبىلىمى جəنە بەس جىلدان كەم ەمەس ەڭبەك ءوتىلى بار قازاقستان رەسپۋبليكاسىنىڭ ازاماتى بولۋى ءتيىس دەگەن تالاپتار قويىلدى.
قويىلعان تالاپتارعا سايكەس ىرىكتەلگەن 300 رەزەرۆشىنىڭ بارلىعى 6 كەزەڭنەن تۇراتىن قاتاڭ ىرىكتەۋدەن ءوتتى.
«جەڭىمپازدار اراسىندا جەكە سەكتوردىڭ 106 وكىلى، كۆازيمەملەكەتتىك سەكتوردىڭ 98 قىزمەتكەرى جانە 96 مەملەكەتتىك قىزمەتكەر بار. كانديداتتاردىڭ 58% الدىڭعى قاتارلى شەتەلدىك ءبىلىمى بار، 42% - قازاقستاندىق جوو تۇلەكتەرى. 6 ادام عىلىم دوكتورى، 204 ادام - ماگيستر دارەجەسىنە يە»، - دەدى انار جايىلعانوۆا.
ىرىكتەۋ جەڭىمپازدارىنىڭ ورتاشا جاسى 31-ءدى قۇرادى. سونىمەن بىرگە، رەزەرۆشىلەر ەكونوميكانىڭ ءتۇرلى سالالارىندا ايتارلىقتاي تاجىريبەگە يە. ولاردىڭ كوپشىلىگى ەكونوميكانىڭ ءتۇرلى سالالارىندا ءىرى شەتەلدىك جانە ترانسۇلتتىق كومپانيالاردا جۇمىس ىستەگەن نەمەسە ءالى دە جۇمىس ىستەيدى.
«رەزەرۆ ىرىكتەۋىنە شەتەلدە جۇرگەن قازاقستاندىقتار دا بەلسەنە قاتىستى. قاتىسۋشىلار ەلىمىزدىڭ بارلىق ايماقتارىنان، سونداي-اق جاقىن جانە الىس شەتەلدەردەن (ازەربايجان، ۇلىبريتانيا، گەرمانيا، رەسەي، تۇركيا جانە فرانتسيا) كەلدى. وڭىرلەر اراسىندا ۇمىتكەرلەردىڭ ەڭ كوبى الماتى (46), قاراعاندى (41) جانە شىعىس قازاقستان وبلىسىنان (30) كەلدى»، - دەدى اگەنتتىك باسشىسى.
ۇلتتىق كوميسسيانىڭ قاراۋىنا تاڭدالعان ۇمىتكەرلەر قاتارىنا ءتۇرلى ۇلت وكىلدەرى بار، سونىڭ ىشىندە قازاقتار، ورىستار، ازەربايجاندار، ارمياندار، نەمىستەر جانە تاتارلار بار.
ايتا كەتەيىك، پرەزيدەنتتىك جاستار كادر رەزەرۆىنە ەنگەن 300 ۇزدىك قازاقستاندىقتار ءتىزىمىن رەسمي سايتتان كورۋگە بولادى.
