جامبىلدىق شارۋالار جاڭا جوبانىڭ ءتيىمدى ەكەنىن ايتادى

1620

ايماقتا «جامبىل وبلىسى تۇرعىندارىنىڭ تۇرمىستىق تابىسىن جاقسارتۋ» جوباسى اياسىندا 7,2 ميلليارد تەڭگە ءبولىنىپ، جىلدىق 2,5 پايىز وسىممەن نەسيە بەرۋ جۇمىستارى باستالعان بولاتىن. وعان اۋىل شارۋاشىلىعى باسقارماسىنىڭ «قر مەملەكەتتىك ساتىپ الۋ تۋرالى» زاڭناماسىنا سايكەس، سەنىم بىلدىرگەن وكىلى (اگەنت) بولىپ «تاراز» الەۋمەتتىك كاسىپكەرلىك كورپوراتسياسى» اكتسيونەرلىك قوعامى بەكىتىلدى.

بۇگىنگى كۇنى «تاراز» الەۋمەتتىك كاسىپكەرلىك كورپوراتسياسى» اق-عا جوبانىڭ بەس باعىتى بويىنشا پيلوتتىق 11 اۋىلدىق وكرۋگتەن 2 228 ءوتىنىش ءتۇسىپ، ونىڭ 974-ءى ماقۇلدانعان.

قازىرگى ۋاقىتتا جوبانىڭ ەكىنشى باعىتى بويىنشا بەرگەن وتىنىشتەرىنە سايكەس، 4 ازامات نەسيە قاراجاتىنا قول جەتكىزدى. اتاپ ايتساق، جامبىل اۋدانىنىڭ تۇرعىنى قانات قاسىموۆ پەن بايزاق اۋدانىنان نۇربوبەك ءابدىرايىموۆ – 5,0 ميلليون تەڭگەدەن، جۋالى اۋدانىنان ءاليزا سىدىرعالي – 4,2 ميلليون تەڭگە جانە شۋ اۋدانىنان داۋرەنكۇل كۇلاشبەكوۆا – 3,2 ميلليون تەڭگە الدى.

جامبىل اۋدانىنىڭ ازاماتى قانات قاسىموۆ جوبانىڭ وتە ءتيىمدى ەكەنىن ايتادى. سونداي-اق ول بۇل باستاما بارلىق اۋداندى قامتىسا دەگەن نيەتىن جەتكىزدى.

«شىنى كەرەك كاسىپ باستايمىن دەيتىن ازاماتتىڭ الدىنان ەڭ ءبىرىنشى شىعاتىن كەدەرگى قارجى. وزدەرىڭىزگە بەلگىلى ەكىنشى دەڭگەيلى بانكتىڭ پايىزدىق ۇستەمەسى جوعارى بولعاندىقتان ودان العان قارجىدان تابىس تابۋ مۇمكىن ەمەس. تابىس تاپپاي تۇگىلى ۇستەمە پايىزىن تولەيمىن دەپ، ءبىراز شاشىلاسىڭ. ال وبلىسىمىزدا پيلوتتىق رەجيمدە ەنگەن جوبانىڭ پايىزى 2,5 پايىز. بۇل قاراپايىم ازامات ءۇشىن قولايلى ءارى قورىقپاي جۇمىس جاساۋعا ىنتالاندىرادى – دەيدى ول.

جۋالى اۋدانىنىڭ تۇرعىنى، «سىدىرعالي ا.س» جەكە كاسىپكەرلىك باسشىسى ءاليزا سىدىرعالي نەسيە قارجىسىنا 3 باس ءمۇيىزدى ءىرى قارا مەن 10 باس بۇقاشىق ساتىپ الىپ، ونىڭ سانىن ارتتىرۋدى جوسپارلاسا، شۋ اۋدانىنداعى «كۇلاشبەكوۆا د.ح.» جك يەسى داۋرەنكۇل كۇلاشبەكوۆا ءمۇيىزدى ءىرى قارا مەن جىلقى مالىن الىپ، كاسىبىن دوڭگەلەتۋدى كوزدەۋدە.

ايتا كەتۋ كەرەك، نەسيە شارتتارىنا سايكەس اۋىل تۇرعىندارىنىڭ نەسيە الۋعا بەرگەن وتىنىشتەرى ماقۇلدانعان جاعدايدا، جەكە كاسىپكەر رەتىندە تىركەۋدەن ءوتىپ، بانكتەن ەسەپشوت اشۋلارى قاجەت. جالپى، كاسىپكەرلەرگە نەسيەنىڭ نەگىزگى وتەمىنە ءبىر جىلعا دەيىن، اي سايىنعى پايىزدىق وتەمىنە جارتى جىلعا دەيىن جەڭىلدىكتەر قاراستىرىلعان.

«ادىرنا»
ۇلتتىق پورتالى

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket