جامبىل وبلىسى تاۋەلسىزدىك جىلدارىندا تولايىم تابىستارعا جەتتى

3137
Adyrna.kz Telegram

جامبىل وبلىسىندا ءوندىرىس كولەمى 6,5 پايىزعا، نەگىزگى كاپيتالعا سالىنعان ينۆەستيتسيا 15 پايىزعا ارتتى. بۇل تۋرالى بۇگىن قر تاۋەلسىزدىك كۇنى مەرەكەسىنە وراي وتكەن سالتاناتتى شارادا وبلىس اكىمى اسقار مىرزاحمەتوۆ ايتتى.

تاۋەلسىزدىكتىڭ 28 جىلعى تاريحىندا ەلىمىزبەن بىرگە جامبىل ءوڭىرى دە ءوسىپ، وركەندەۋ مەن جاڭعىرىپ، جاڭارۋدى باستان كەشتى. ايماق باسشىسى سالتاناتتى شارادا بايانداما جاساپ، تاۋەلسىزدىك تاعىلىمىنا توقتالىپ، باعاسىن باعالاي ءبىلۋدىڭ ماڭىزدىلىعىن جەتكىزدى. سونداي-اق، ايماقتا اتقارىلعان اۋقىمدى جۇمىستار بارىسىن تىلگە تيەك ەتتى.

«بۇگىندە جامبىل وبلىسى سەرپىندى دامۋ جولىنا ءتۇستى دەپ ايتۋعا بولادى. بيىل وبلىستىڭ ارالىق ەكونوميكالىق ءوسىمى 5 پايىزدان اسادى. ونەركاسىپ ءوندىرىسىنىڭ كولەمى 6,5 پايىزعا، نەگىزگى كاپيتالعا سالىنعان ينۆەستيتسيالار 15 پايىزعا ارتتى. بۇل رەتتە جەكە ينۆەستيتسيالاردىڭ ۇلەسى 20 پايىزعا ارتتى»، - دەدى اسقار مىرزاحمەتوۆ.

وڭىردە، «ەڭبەك» باعدارلاماسىنا 36 مىڭ ادام قاتىسىپ، 27 مىڭ ادام جۇمىسپەن قامتىلعان. 18 مىڭ جاڭا جۇمىس ورنى قۇرىلدى، ونىڭ ىشىندە 11,5 مىڭى تۇراقتى.

«ءبىلىم بەرۋ سالاسىندا 15 مەكتەپكە دەيىنگى ۇيىم اشىلدى، 3 جاستان 6 جاسقا دەيىنگى بالالاردى قامتۋ 100 پايىزعا جەتتى. سونداي-اق، اۋىل حالقىن العاشقى مەديتسينالىق كومەك نىساندارىمەن 100 پايىز قامتۋ، بيىل 65 مەديتسينالىق مەكەمە سالۋ ناتيجەسىندە بولىپ وتىر. جامبىلدىقتاردىڭ ءال-اۋقاتىن جاقسارتۋعا مەملەكەتتىك جانە سالالىق باعدارلامالار باعىتتالعان»، - دەدى اسقار مىرزاحمەتوۆ.

شارا بارىسىندا قر پرەزيدەنتىنىڭ جارلىعىنا سايكەس مەملەكەتتىك جانە قوعامدىق قىزمەتتە cىڭىرگەن ەڭبەگى، ەلدىڭ الەۋمەتتىك-ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن ناگرادتالعان بىرقاتار ازاماتتارعا ماراپاتتارى تابىستالدى.

اتاپ ايتساق، «قۇرمەت» وردەنىنە يە بولعاندار قاتارىندا جازۋشى، «جامبىل» جۋرنالىنىڭ باس رەداكتورى نەسىپبەك داۋتاەۆ، «قازفوسفات» جشس جامبىل فيليالىنىڭ (ججفز) باس ينجەنەرىنىڭ ورىنباسارى الەكساندر مالىش، اقىن، ەڭبەك ارداگەرى شىرىن ماماسەرىكوۆا، وبلىس اكىمىنىڭ اپپاراتىنىڭ باسشىسى رۇستەم داۋلەت، «تارازەنەرگوورتالىق» اك باسقارما توراعاسى باقبەرگەن ماۋلەنوۆ، مويىنقۇم اۋدانىنىڭ اكىمى مادەن مۇساەۆ، «مەيىرىم» مەديتسينالىق ورتالىعىنىڭ ديرەكتورى گۇلدارا نۇرىموۆا، وبلىسى اكىمدىگىنىڭ ەنەرگەتيكا، تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆ، وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا ماديەۆا بار.

ال، «قازفوسفات» جشس «مينەرالدى تىڭايتقىشتار» زاۋىتىنىڭ №1 تسەحىنىڭ سلەسار-جوندەۋشىسى جەكسەن اكىجانوۆ پەن «جامبىل ەلەكتر جۇيەسى» فيليالىنىڭ كراسنوگور تاراتۋ ەلەكتر جۇيەسى ەلەكتوسلەسارى ەدۋارد شتارك III-دارەجەلى «ەڭبەك داڭقى» وردەنىمەن ماراپاتتالدى. بۇل ناگرادانى نۇر-سۇلتان قالاسىندا مەملەكەت باسشىسىنىڭ ءوز قولىنان العاندار اراسىندا تاراز قالاسىنىڭ تۇرعىنى «قازاقستان تەمىر جولى-جۇك تاسىمالداۋ» اق «جامبىل جۇك تاسىمالداۋ بولىمشەسى» جامبىل پايدالانۋ لوكوموتيۆ دەپوسى ۆاگون قاراۋشى-جوندەۋشىسى نيكولاي حومۋتەنكو دا بار ەكەنىن ايتىپ ءوتۋ كەرەك.

سونداي-اق، تاراز قالاسىنىڭ تۇرعىنى «اينۇرى» تاتار-باشقۇرت مادەني ورتالىعى» قوعامدىق بىرلەستىگىنىڭ توراعاسى امير حاليكوۆ ءىى دارەجەلى «دوستىق» وردەنىمەن، كەنەن ازىرباەۆ اتىنداعى جامبىل وبلىستىق فيلارمونياسىنىڭ ءارتىسى باقىت شاعىرباەۆ «قازاقستاننىڭ ەڭبەك سىڭىرگەن قايراتكەرى» اتاعىمەن ماراپاتتالعان.

جيىندا وزگە دە بىرقاتار ازاماتتارعا «ەرەن ەڭبەگى ءۇشىن»، «شاپاعات» مەدالدارى، قر-نىڭ «قۇرمەت» گراموتالارى، قر پرەزيدەنتىنىڭ العىس حاتى جانە «بارىس» توسبەلگىسى تابىستالدى. شارا سوڭى جەرگىلىكتى ونەرپازداردىڭ كونۋەرتتىك باعدارلاماسىنا ۇلاستى.

«ادىرنا»

 ۇلتتىق پورتالى

 

 

پىكىرلەر