10 جەلتوقساندا شىعىس قازاقستان وبلىسىندا كاسىپكەردەن 50 ميلليون تەڭگە بوپسالاعان پروكۋرورلار قولعا ءتۇستى
قازاقستاننىڭ ۇلتتىق قاۋىپسىزدىك كوميتەتى پروكۋراتۋرا ورگاندارى قىزمەتكەرلەرىنىڭ زاڭعا قايشى ارەكەتىنىڭ جولىن كەستى.
"ۇلتتىق قاۋىپسىزدىك كوميتەتى باس پروكۋراتۋرانىڭ ىشكى تەرگەۋ دەپارتامەنتىمەن بىرلەسىپ، 2019 جىلدىڭ جەلتوقسانىندا پروكۋراتۋرا ورگاندارى لاۋازىمدى ادامدارىنىڭ جەكە كاسىپكەرلىك وكىلىنەن اسا ءىرى مولشەردە اقشالاي قاراجاتتى قورقىتىپ الماق بولعان ارەكەتىنىڭ جولىن كەستى", - دەپ جازىلعان ۇقك ءباسپاسوز قىزمەتىنىڭ حابارلاماسىندا.
اتاپ ايتقاندا، 2019 جىلدىڭ 10 جەلتوقسانىندا شىعىس قازاقستان وبلىسىنىڭ وسكەمەن قالاسىندا كاسىپكەردەن 50 ميلليون تەڭگە مولشەرىندە قورقىتىپ اقشا الۋ كەزىندە قازاقستان باس كولىك پروكۋراتۋراسى قىلمىستىق قۋدالاۋ باسقارماسىنىڭ اعا پروكۋرورى ءالجاپپار قۇتانوۆ جانە شقو پروكۋراتۋراسى قوعام مۇددەلەرىن قورعاۋ باسقارماسى باستىعىنىڭ ورىنباسارى ايدوس رامازانوۆ قىلمىس ۇستىندە ۇستالدى.
ۇستالعاندارعا قاتىستى قازاقستان قىلمىستىق كودەكسىنىڭ 194-بابى 4-بولىگى 2-تارماعى ("قورقىتىپ الۋ") بويىنشا سوتقا دەيىنگى تەرگەۋ جالعاسۋدا.
Sputnik.
