جامبىل وبلىسىنىڭ بارلىق كوللەدجىندە «زاڭ مەن ءتارتىپ» قاعيداتى اياسىندا ءبىلىم الۋشىلاردىڭ قاۋىپسىزدىگىن قامتاماسىز ەتۋ، قۇقىقتىق مادەنيەتىن قالىپتاستىرۋ جانە تارتىپكە نەگىزدەلگەن ورتا قۇرۋ باعىتىندا اپتالىق وتكىزىلدى. بۇل باستاما جاس ۇرپاقتىڭ سانالى، جاۋاپتى، زاڭعا قۇرمەتپەن قارايتىن ازامات بولىپ قالىپتاسۋىنا ىقپال ەتۋدى كوزدەيدى.
اپتالىق اياسىندا وبلىستاعى 42 تەحنيكالىق جانە كاسىپتىك ءبىلىم بەرۋ مەكەمەلەرىندە ءتۇرلى ءىس-شارالار وتكىزىلىپ، 10 مىڭنان اسا ستۋدەنت قامتىلدى.
سونىڭ ءبىرى – «بوس ۋاقىتتى ءتيىمدى پايدالانۋ: زاڭدىق ءتارتىپ پەن بۋللينگسىز ورتا قالىپتاستىرۋ» تاقىرىبىنداعى وبلىستىق سەمينار. اتالعان جيىندا ءبىلىم الۋشىلاردىڭ بوس ۋاقىتىن ءتيىمدى ۇيىمداستىرۋ ارقىلى قۇقىق بۇزۋشىلىقتىڭ الدىن الۋ، بۋللينگكە جول بەرمەۋ جانە قاۋىپسىز ءبىلىم بەرۋ ورتاسىن قالىپتاستىرۋ ماسەلەلەرى جان-جاقتى تالقىلاندى.
سەمينار بارىسىندا قۇقىق قورعاۋ ورگاندارىنىڭ وكىلدەرى، مەديا سالاسىنىڭ ماماندارى مەن تاجىريبەلى پەداگوگتەر جاستار اراسىنداعى وزەكتى ماسەلەلەرگە توقتالدى. اتاپ ايتقاندا، ستۋدەنتتەردىڭ ۋاقىتتىق رەسۋرستارىن ءتيىمدى جوسپارلاۋ، اقپاراتتىق قاۋىپسىزدىك، كيبەربۋللينگتىڭ الدىن الۋ، سونداي-اق قۇقىقتىق مادەنيەتتى قالىپتاستىرۋداعى پروكۋراتۋرا مەن پوليتسيا قىزمەتىنىڭ ءرولى كەڭىنەن ءسوز بولدى.
سونىمەن قاتار، قۇندىلىققا نەگىزدەلگەن تاربيە جۇيەسىن دامىتۋعا ەرەكشە نازار اۋدارىلىپ وتىر. ءبىلىم بەرۋ ۇيىمدارىندا READX جانە «451 گرادۋس» جوبالارى، كوڭىلدىلەر مەن تاپقىرلار كلۋبى، ستۋدەنتتىك ءوزىن-ءوزى باسقارۋ ۇيىمدارى مەن ءتۇرلى ۇيىرمەلەردىڭ جۇمىسى جاندانىپ كەلەدى. بۇل باستامالار ءبىلىم الۋشىلاردىڭ بوس ۋاقىتىن ءتيىمدى وتكىزۋگە، شىعارماشىلىق جانە زياتكەرلىك الەۋەتىن ارتتىرۋعا مۇمكىندىك بەرەدى.
جالپى، «زاڭ مەن ءتارتىپ» قاعيداتى – ءبىلىم بەرۋ ۇيىمدارىندا ءتارتىپ پەن جاۋاپكەرشىلىك مادەنيەتىن قالىپتاستىرۋعا باعىتتالعان ماڭىزدى باستاما. وسىنىڭ اياسىندا ۇيىمداستىرىلىپ جاتقان ءىس-شارالار جاستاردىڭ قۇقىقتىق ساۋاتتىلىعىن ارتتىرىپ قانا قويماي، ولاردىڭ بوس ۋاقىتىن ءتيىمدى ۇيىمداستىرۋ ارقىلى قاۋىپسىز ءارى قولايلى ءبىلىم بەرۋ ورتاسىن قالىپتاستىرۋعا مۇمكىندىك بەرۋدە.
وسىنداي كەشەندى جۇمىستاردىڭ ناتيجەسىندە ءوڭىر جاستارىنىڭ بويىندا زاڭعا قۇرمەت، تارتىپكە باعىنۋ جانە قوعام الدىنداعى جاۋاپكەرشىلىك سياقتى ماڭىزدى قۇندىلىقتار نىعايا تۇسۋدە.
