"اتاجۇرت ەرىكتىلەرى" ۇيىمىنىڭ نۇر-سۇلتانداعى كەڭسەسىندەگى جيىندا پارتيا قۇرۋدى كوزدەيتىن باستاماشىل توپ استانادا شتاب قۇرىپ، پارتيا باعدارلاماسىن تانىستىرۋى ءتيىس ەدى. جيىنعا پارتيا قۇرۋ يدەياسىن كوتەرگەن بەلسەندى جانبولات ماماي الماتىدان Skype ارقىلى قاتىستى (ماماي بيلىكتى سىناۋشى شەتەلدە تۇراتىن مۇحتار ءابليازوۆتان "اقشا الىپ، گازەت شىعاردى" دەپ ءۇش جىلعا باس بوستاندىعى شەكتەلگەن. ونىڭ پروباتسيالىق مەرزىمى اياقتالماعاندىقتان الماتىدان باسقا قالاعا شىعا المايدى).
باستاماشىل توپ پارتيا قۇرۋداعى ماقساتتارىن ايتىپ جاتقاندا ءوزىن “جالعىزباستى انا ءارى دارىگەر جانات اشيروۆا قوزىباەۆنا” دەپ تانىستىرعان ايەل "قانشا جيىن وتكىزدىڭىزدەر، دەموكراتيا دەيسىزدەر، وسىعان دەيىن نە شەشتىڭىزدەر؟ ماسەلە شەشىلدى مە؟ ايتاسىزدار دا قوياسىزدار. حالىقتى الداماڭدار، پارتيا قاجەت ەمەس" دەپ شۋ شىعاردى. ونىڭ ءسوزىن جانىندا وتىرعان تاعى ەكى ايەل دە قولداپ، "جانبولات ماماي پارتيا قۇرامىن دەسە استاناعا نەگە كەلمەيدى، الماتىدا نە ىستەپ وتىر؟" دەدى.
ماماي ءۇش جىلعا سوتتالعانىن، پروباتسيا ۋاقىتىندا الماتىدان شىعا المايتىنىن، سوندىقتان Skype ارقىلى بايلانىسىپ وتىرعانىن ايتتى. بىراق ايەلدەر مامايدىڭ دا ايتقانىن تىڭداماي، قايتا شۋلادى. باستاماشىل توپ ايەلدەردەن شىعىپ كەتۋدى سۇراپ ەدى، ولار زالدان شىعۋدان باس تارتتى.
كەيىن ايەلدەر "ماماي ساتقىن", "دەرموكراتى، ۆى نام نە نۋجنى" دەگەن جازۋى بار پلاكاتتارىن شىعاردى.
جيىن سوڭىندا شۋ ءسال باسىلىپ، باستاماشىل توپ پارتيانىڭ نۇر-سۇلتانداعى شتابى قۇرىلعانىن جاريالادى.
24 قاراشا تاڭەرتەڭ باستاماشىل توپتىڭ قاراعاندىداعى جيىنىندا بىرنەشە ادام شۋ شىعارىپ، جيىننىڭ وتۋىنە كەدەرگى كەلتىرگەن. شۋ شىعارعاندار قولدارىنا "ماماي ساتقىن", ء"بىز سەنبەيمىز" دەگەن پلاكات ۇستاپ تۇرعان.
باستاماشىل توپتىڭ وتكەن اپتاداعى قىزىلورداداعى جيىنىندا بەلگىسىز ادامدار داۋلاسىپ، جيىنعا كەدەرگى كەلتىرگەن. بۇل قالاداعى جينالىس كەيىن پارتيا قۇرىلعانىن قولدايتىن تۇرعىننىڭ ۇيىندە جالعاسقان. باستاماشىل توپ وكىلدەرى ءار قالاداعى شۋعا قاراماستان پارتيانىڭ شتابتارى قۇرىلعانىن ايتادى.
جانبولات ماماي 16 قازاندا الماتىداعى جيىندا "قازاقستاننىڭ دەموكراتيالىق پارتياسىن" قۇراتىنىن مالىمدەگەن. ول “پارتيانىڭ ماقساتى سايلاۋعا ءتۇسۋ ەمەس، ەلدەگى بيلىك جۇيەسىنە وزگەرىس ەنگىزۋ، حالىقتىڭ ءۇنىن بيلىككە جەتكىزۋ” ەكەنىن ايتقان.
قازىر قازاقستاندا "نۇر وتان", "اق جول", كوممۋنيستىك حالىقتىق پارتيا، "بىرلىك", "اۋىل", جسدپ جانە "ازات" پارتيالارى رەسمي تىركەلگەن. ونىڭ ۇشەۋى - "نۇر وتان", "اق جول" جانە كوممۋنيستىك حالىقتىق پارتيانىڭ قازاقستان پارلامەنتىنەن ورىن العان.
قازاقستان زاڭىنا ساي، پارتيا قۇرعىسى كەلگەندەر الدىمەن مىڭ ادام قاتىسقان قۇرىلتاي وتكىزۋى ءتيىس. بيلىك 40 مىڭ مۇشەسى بار پارتيالاردى عانا رەسمي تىركەيدى.
"ازاتتىق" راديوسى
فوتو اۆتورى ينگا يمانباي
