"Atajurt eriktileri" uıymynyń Nur-Sultandaǵy keńsesindegi jıynda partııa qurýdy kózdeıtin bastamashyl top astanada shtab quryp, partııa baǵdarlamasyn tanystyrýy tıis edi. Jıynǵa partııa qurý ıdeıasyn kótergen belsendi Janbolat Mamaı Almatydan Skype arqyly qatysty (Mamaı bılikti synaýshy shetelde turatyn Muhtar Áblıazovtan "aqsha alyp, gazet shyǵardy" dep úsh jylǵa bas bostandyǵy shektelgen. Onyń probaııalyq merzimi aıaqtalmaǵandyqtan Almatydan basqa qalaǵa shyǵa almaıdy).
Bastamashyl top partııa qurýdaǵy maqsattaryn aıtyp jatqanda ózin “jalǵyzbasty ana ári dáriger Janat Ashırova Qozybaevna” dep tanystyrǵan áıel "qansha jıyn ótkizdińizder, demokratııa deısizder, osyǵan deıin ne sheshtińizder? Másele sheshildi me? Aıtasyzdar da qoıasyzdar. Halyqty aldamańdar, partııa qajet emes" dep shý shyǵardy. Onyń sózin janynda otyrǵan taǵy eki áıel de qoldap, "Janbolat Mamaı partııa quramyn dese astanaǵa nege kelmeıdi, Almatyda ne istep otyr?" dedi.
Mamaı úsh jylǵa sottalǵanyn, probaııa ýaqytynda Almatydan shyǵa almaıtynyn, sondyqtan Skype arqyly baılanysyp otyrǵanyn aıtty. Biraq áıelder Mamaıdyń da aıtqanyn tyńdamaı, qaıta shýlady. Bastamashyl top áıelderden shyǵyp ketýdi surap edi, olar zaldan shyǵýdan bas tartty.
Keıin áıelder "Mamaı satqyn", "dermokraty, vy nam ne nýjny" degen jazýy bar plakattaryn shyǵardy.
Jıyn sońynda shý sál basylyp, bastamashyl top partııanyń Nur-Sultandaǵy shtaby qurylǵanyn jarııalady.
24 qarasha tańerteń bastamashyl toptyń Qaraǵandydaǵy jıynynda birneshe adam shý shyǵaryp, jıynnyń ótýine kedergi keltirgen. Shý shyǵarǵandar qoldaryna "Mamaı satqyn", "Biz senbeımiz" degen plakat ustap turǵan.
Bastamashyl toptyń ótken aptadaǵy Qyzylordadaǵy jıynynda belgisiz adamdar daýlasyp, jıynǵa kedergi keltirgen. Bul qaladaǵy jınalys keıin partııa qurylǵanyn qoldaıtyn turǵynnyń úıinde jalǵasqan. Bastamashyl top ókilderi ár qaladaǵy shýǵa qaramastan partııanyń shtabtary qurylǵanyn aıtady.
Janbolat Mamaı 16 qazanda Almatydaǵy jıynda "Qazaqstannyń demokratııalyq partııasyn" quratynyn málimdegen. Ol “partııanyń maqsaty saılaýǵa túsý emes, eldegi bılik júıesine ózgeris engizý, halyqtyń únin bılikke jetkizý” ekenin aıtqan.
Qazir Qazaqstanda "Nur Otan", "Aq jol", Kommýnıstik halyqtyq partııa, "Birlik", "Aýyl", JSDP jáne "Azat" partııalary resmı tirkelgen. Onyń úsheýi - "Nur Otan", "Aq jol" jáne Kommýnıstik halyqtyq partııanyń Qazaqstan parlamentinen oryn alǵan.
Qazaqstan zańyna saı, partııa qurǵysy kelgender aldymen myń adam qatysqan quryltaı ótkizýi tıis. Bılik 40 myń múshesi bar partııalardy ǵana resmı tirkeıdi.
"Azattyq" radıosy
Foto avtory Inga Imanbaı
