رۋسلان تولەگەنوۆتىڭ ەسىمى – جامبىلدىقتارعا ەتەنە تانىس. جيىرما جىلعا جۋىق مۇمكىندىگى شەكتەۋلى جانداردىڭ ماسەلەسىمەن اينالىسىپ كەلە جاتقان ازامتتىڭ ءىسى كوپكە ۇلگى.
رۋسلان قانشىبەكۇلىنىڭ نەگىزگى ماماندىعى - زاڭگەر. كەمتار جانداردىڭ قۇقىعىن قىزعىشتاي قورعاپ جۇرگەن ول 2000 جىلدان باستاپ «مۇگەدەكتەردىڭ جاستار قوعامى» قق توراعاسىنىڭ ورىنباسارى بولعان. اراعا بىرنەشە جىل سالىپ، ياعني 2004-2013 جىلدار ارالىعىندا «مۇگەدەكتەردىڭ جاستار قوعامى» قق توراعاسى بولدى. جاۋاپتى جۇمىسىن اتقارا ءجۇرىپ، 2012 جىلى «جامبىل وبلىستىق مۇگەدەكتەرمەن جۇمىس ىستەۋ «اسار» ۇيىمدار كەڭەسى» زتق-ءىن باسقارسا، بۇگىندە جامبىل وبلىسى اكىمىنىڭ مۇمكىندىگى شەكتەۋلى ازاماتتار ماسەلەسى بويىنشا كەڭەسشىسى ءارى جامبىل وبلىستىق «اسار» مۇگەدەكتەرمەن جۇمىستى ۇيىمداستىرۋ ۇيىمىنىڭ توراعاسى.
«بالا كەزىمنەن ەكىنشى توپ مۇگەدەك بولعاندىقتان، كەمتار جانداردىڭ ءومىرىنىڭ وڭاي ەمەستىگىن جاقسى بىلەمىن. سول سەبەپتى، مۇگەدەكتەر ماسەلەسىمەن اينالىسىپ، تەڭىزگە تامعان تامشىداي بولسا، ولاردىڭ ومىرلەرىن جەڭىلدەتۋگە بار كۇش-جىگەرىمدى سالىپ كەلەمىن، - دەيدى ول اعىنان جارىلىپ.
رۋسلان تولەگەنوۆتىڭ ايتۋىنشا، 2000 جىلداردىڭ باسىندا الەۋمەتتىك جوبالاردىڭ كوپشىلىگى شەت ەلدىك گرانت بەرۋشىلەر تاراپىنان قارجىلاندىرىلعان. الايدا ۋاقىت وتە كەلە مەملەكەت مۇمكىندىگى شەكتەۋلى جاندار قۇقىعىنىڭ قورعالۋىنا باعىتتالعان باعدارلامالاردى جۇزەگە اسىردى جانە بۇگىندە مەملەكەتتىك الەۋمەتتىك تاپسىرىس اياسىندا مۇگەدەكتەرگە ارنالعان الەۋمەتتىك جوبالارعا كوڭىلى تولاتىنىن جەتكىزدى.
راس، قازىرگى تاڭدا مۇگەدەكتەردى وقىتۋ، جۇمىسقا ورنالاستىرۋ، باسپانامەن قامتاماسىز ەتۋ، ولاردىڭ ءجۇرىپ-تۇرۋلارىنا ءتيىستى جاعدايلار جاساۋ، دەنساۋلىقتارىن وڭالتۋ، ساۋىقتىرۋ سىندى ماسەلەلەر بىرتىندەپ ءوز شەشىمىن تاۋىپ كەلەدى.
دەسە دە، رۋسلان تولەگەنوۆ مۇگەدەكتەردىڭ باسپانالى بولۋى ءۇشىن مەملەكەت تاراپىنان ءالى دە بولسا، بىرقاتار جەڭىلدىكتەر قاراستىرىلعانىن قالايدى.
- ەكىنشى دەڭگەيلى بانكتەر ءبىرىنشى، ەكىنشى توپتاعى مۇگەدەكتەردى جۇمىسقا جارامسىز دەپ تانىپ، نەسيە بەرمەيدى. ال يپوتەكاعا ءۇي الۋ ماسەلەسى ءتىپتى قيىن. وسى وزەكتى ماسەلە شەشىلسە ەكەن،-دەپ جۇرەكجاردى تىلەگىن جەتكىزدى.
كوپشىلىكتىڭ ەسىندە بولار، وتكەن جىلى تاراز قالاسىندا مۇمكىندىگى شەكتەۋلى بالالاردى ەمدەۋگە ارنالعان يپپوتەراپيا كلۋبى اشىلعان بولاتىن. جىلقى كلۋبى تارازداعى «زەربۇلاق» دەمالىس ايماعىندا ورنالاسقان. مۇندا ەمدەۋ شارالارى وتكىزىلەتىن ۇلكەن يپپودروم دا سالىنعان. وسىناۋ يگى ءىستىڭ باسىندا رۋسلان قانشبەكۇلىنىڭ تۇرعانىن دا ماقتانىشپەن اتاپ وتۋگە ابدەن بولادى.
«يپپوتەراپيا – اتقا مىنگىزىپ ەمدەۋ، ياعني ات ءبيوورىسى تسەرەبرالدىق سال اۋرۋىنا شالدىققان ادامدار ءۇشىن پايدالى. اتتىڭ اياعى بالانىڭ ءجۇرىسىن ءجىتى قاداعالايدى. ءبىز دامىعان ەلدەردىڭ تاجىريبەسىن قولدانىپ، ونى ءوز ەلىمىزدە ءىس-جۇزىنە اسىرىپ وتىرمىز »، – دەدى رۋسلان تولەگەنوۆ.
اقيقاتىندا مىنا دوڭگەلەنگەن دۇنيەنى مەيىرىمدىلىك دەيتىن اسىل سەزىم ساقتاپ تۇرعانداي كورىنەدى. دەمەك، قوعامدا جومارت جۇرەكتى جاندار كوپ بولسا، تاعدىردىڭ تالكەگىنە تاپ بولعان ادامدار دا، ول قيىندىقتاردى وڭاي ەڭسەرمەك...
«ادىرنا»
ۇلتتىق پورتالى
