تۇياقتى تۇياق جىبەرمەيدى

960

ەسىمىزدە ءالى. ماقانشىنىڭ باعىنا بىتكەن قوس كوك ات بولدى. «ارقالدى» سوۆحوزىنىڭ اتىنان سىنعا ءتۇسىپ، ولجا سالعان جانۋارلار جىل ون ەكى اي بابىندا بولاتىن. كوك جورعانى كوسىلتىپ مىنەتىن ن.قاسپاقوۆ، ءتىپتى اسفالت ۇستىندە سۋ توگىلمەيتىن جۇرىسىمەن جۇرتتى ءتانتى ەتەتىن.

زەكەننىڭ كوگى قىسى-جازى جەگىندە جۇرسە دە، جارىس كەزىندە الدىنا جۇيرىك تۇسىرمەيتىن. زەكەن اتا ءىزىن باعىپ، بابىنان ءبىر جاڭىلمايتىن اتتىڭ تابيعاتىنان سىر شەرتۋىن ءوتىنىپ بارعانىمىز دا بار. «جىلقى جارىقتىق كيەلى جانۋار عوي، – دەپ ءسوز باستاعان كانىگى اتبەگى، – وسى كوك ات ءوزىن-ءوزى جاراتادى»، – دەگەندى ايتتى. سودان سوڭ: «مايسا ءشوپ پەن سۇلىعا شەكتەۋ جوق. سۋدىڭ دا تازاسىن بەرەمىز. قانشا ءىشۋ، قانشا جەۋدى ءوزى مولشەرلەيدى. كەيدە قازى الادى. ارتىنشا جاراپ كەتەدى. بابىمەن جۇرەتىن زامان با بۇل؟ جازدا اربا، قىستا شانا تارتادى»، – دەدى.

جانە شانا بولعاندا قانداي! بىردە ءشوپ تاۋسىلىپ، زەكەن اقساقال سوۆحوز باسشىلارىنا بارادى. قار ەرىپ كەلەدى. «دت تىركەمەسەڭ تارتا المايدى. بەرۋىن بەرەمىز. جەتكىزۋىن وزىڭىزگە قالدىردىق» دەسە كەرەك. كوك اتتى شاناعا جەككەن قارت تاياۋ جەردەگى مايانىڭ بىرىنە بارىپ، جالعىز ءوزى ءشوپ تيەي باستايدى. «شال قانشا اشا ارتار» دەيسىڭمەن، ءبىر توپ جىگىت سىرتىنان قاراپ تۇرىپتى. مايانىڭ ءبىراز مولشەرى شاناعا قوتارىلعاندا دا اقساقال بەلىن جازىپ، دەمالماعان. «بۇل كىسى اتىن ولتىرەتىن بولدى» دەپ بايگە كوككە جانى اشىعاندار تابىلادى. سول تۇستا كەڭشار باسشىلارى دا جۇرسە كەرەك. «ءاي، اقساقال، سونشا نە كورىندى. ءشوپ جەتكىزەمىن دەيسىڭ، جانۋاردىڭ وبالىنا قالمايسىڭ با؟» دەگەندەر داۋىسى ەستىلگەن شاقتا، «ول جاعىن كوك ات ەكەۋمىزگە قويا بەر. كومەكتەسكەن جوقسىڭدار. تىم بولماسا دەمەپ، شانانىڭ ۇستىنە شىعۋىما كومەكتەس» دەپتى يلىكپەي. شومەلە سەكىلدەنگەن شوپكە جايعاسقان سوڭ، تىزگىندى اقىرىن عانا قوزعاپ قالادى. قار ەرىپ جاتقان كەز دەدىك قوي. كوك ات ءبىر ىشقىنىپ، شانانىڭ تابانىن قارا جەرگە جانىپ، تاس جولعا ءبىر-اق شىعىپتى. الگى كورىنىستىڭ كۋاسى بولعاندار كوك اتقا دا، زەكەن قارتقا دا ريزا بولىسىپتى.

 بۇل كەز كەلگەن اۋىلدا كەزدەسەتىن وقيعا شىعار. تارباعاتايدىڭ تاسىنان قايرات الا ما، الدە قايراق تاستار تۇياعىن بەكىتىپ، جىگەرىن وياتا ما؟ اقسۋات جاقتا دا نە جۇيرىك اتتار يەسىنە بەدەل اكەلدى. ەركە جيرەن مەن ەلىك جيرەن رەسپۋبليكالىق جارىستاردا جۇلدەگە ءىلىندى. كەيىن شاۋ تارتقاندا قوس جيرەننىڭ ءبىرىن شارۋاشىلىق ەتكە وتكىزەدى. سەمەي ەت كومبيناتىنىڭ ماڭىندا جايىلىسقا شىعارعاندا جانۋار قورشاۋدان قارعىپ ءوتىپ، تارباعاتايعا تارتىپ كەتىپتى. جول اراسى 700 شاقىرىمداي. يت-قۇسقا جەم بولادى. الدەبىرەۋ ۇستاپ العان بولار دەپ ەشكىم سوڭىنان تۇسپەيدى. كۇندەردىڭ كۇنىندە جۇدەگەن جيرەن جەم جەيتىن قوراسىنىڭ الدىنا كەلىپ تۇر دەيدى. وسىنىڭ ءوزى جىلقى قاسيەتىنە تاپتىرماس قازىق

.


امانكەلدى سەيتحان،

“الاش ايناسى”

 

پىكىرلەر