اتىراۋدان 2500 جىلدىق تاريحى بار قازان تابىلدى

2607
Adyrna.kz Telegram

اتىراۋ تاريحي-ولكەتانۋ مۋزەيى جاڭاجادىگەرمەن تولىقتى. وسى جولى ارحەولوگتار يندەر اۋدانى اۋماعىنداعى بورسىقتى قورىمىنان قولادان قۇيىلعان تايقازان تاپتى، دەپ جازادى «حابار» ارناسىنىڭ سايتى.

ماماندار  قازاننىڭ تاريحىن وسىدان 2500 جىل بۇرىن حازار تەڭىزىن مەكەندەگەن سارماتتار داۋىرىمەن بايلانىستىرىپ وتىر. بۇل جادىگەرلەر – ءبىزدىڭ داۋىرىمىزگە دەيىنگى 3-5 مىڭ جىلدىقتاردىڭ مۇراسى. سىيىمدىلىعى شامامەن 100 ليترلىك مىنا تايقازاننىڭ ءبىر ەرەكشەلىگى – مايىسىپ، قابىستىرلعان. ماماندار قازاننىڭ بۇيىرىنەن 27 تەسىك تاپتى. «دەمەك، وتباسىنىڭ باستى قۇندىلىعى سانالاتىن دۇنيە ادەيى ىستەن شىعارىلعان»، – دەيدى عالىمدار.تابىلعان قازانعا قاتىستى ءا.مارعۇلان اتىنداعى ارحەولوگيالىق ينستيتۋتىنىڭ ءبولىم مەڭگەرۋشىسى ارمان بەيسەنوۆ پىكىرىن ءبىلدىردى.

«قازاننىڭ وسىعان دەيىنگى يەسى قايتىس بولعان بولۋى كەرەك. مۇمكىن يەسىنىڭ ارتىنان جالعاستىراتىن ۇرپاعى بولماعان بولۋى كەرەك دەپ ويلايمىز. دەمەك، سول جانۇيانىڭ الدەقانداي سەبەپتەرمەن ۇرپاعى جالعاسپاي قالعان. بورسىقتى قورىمىنان مۇنان وزگە 20-عا جۋىق كونە جادىگەر تابىلدى. ونىڭ ىشىندە سارماتتار داۋىرىنە جاتاتىن ءيىسماي قۇياتىن قۇتى، تەمىردەن سوعىلعان كەزدىك پەن قىلىش، قايراق تاس سەكىلدى بۇيىمدار بار. مامانداردىڭ نازارىن اۋدارعان تاعى ءبىر نارسە مىنا سۇيەكتەن جاسالعان قاسىق بولدى»، - دەيدى ا.بەيسەنوۆ. وبلىستىق تاريحي-ولكەتانۋ مۋزەيىنىڭ ديرەكتورى راشيدا حاريپوۆانىڭ ايتۋىنشا تابىلعان جادىگەرلەر ساق-سارمات داۋىرىنە جاتادى.«بۇرىن مىسالى قازاندار بىرەن-ساران تابىلعانىمەن، سۇيەك قاسىق العاش تابىلىپ وتىر. مۋزەيدىڭ ارحەولوگ ماماندارىنىڭ پايىمداۋىنشا، بۇل جەرگە ايەل ادام جەرلەنگەن بولۋى مۇمكىن. اتىراۋ وبلىسىندا ارحەولوگيالىق قازبا جۇمىستارى ونان ءارى جالعاسۋدا. بۇعان دەيىن ەلىمىز بويىنشا ءۇشىنشى التىن ادام تابىلعان «ارالتوبە»، التىن اشەكەيلى ايەل مۇردەسى شىققان «قورعانشا» مەن بەس قارۋى بەلىنە بايلانعان حانشا تابىلعان «اقتوبە» قالالارىنىڭ ورنى تالاي سىردى ىشىنە بۇگىپ جاتقانى انىق. سوندىقتان ءبىر كەزدەگى سارماتتار مەن ساقتاردىڭ وتانى بولعان ءوڭىر عالىمداردىڭ قىزىعۋشىلىعىن ارتتىرىپ وتىر»، - دەدى ر.حاريپوۆا.


اۆتورلارى: ارىستانبەك كەنجە، تەمىرلان سۇلتانعازيەۆ 

 

 

پىكىرلەر