«اق جول» پارتياسىنىڭ دەپۋتاتى كەڭەس ابساتيروۆ ۆيتسە-پرەمەر بەردىبەك ساپارباەۆقا «كۇندەلىك» قوسىمشاسىندا اقاۋلاردىڭ بولۋىنا بايلانىستى ونى ۋاقىتشا توقتاتۋ جونىندەگى دەپۋتاتتىق ساۋالىن جولدادى.
بۇل «اق جول» فراكتسياسىنىڭ اتالمىش اقپاراتتىق قوسىمشاعا بايلانىستى جىبەرگەن العاشقى ساۋالى ەمەس ەكەنىن ايتىپ ءوتۋ كەرەك.
فراكتسياعا كەلىپ تۇسكەن سايلاۋشىلاردىڭ شاعىمىنا (23 قازانداعى) قاراعاندا، ماسەلەنىڭ ءالى دە شەشىلمەگەنىن كورەمىز.
«توقسان اياعىندا مۇعالىمدەر وقۋشىلاردىڭ قورىتىندى باعاسىن قويۋى شارت. ال، ءبىلىم جانە عىلىم مينيسترلىگىنىڭ «كۇندەلىك» ەلەكتروندى جۋرنالىن ۋاقىتىلى تولتىرۋ جونىندەگى تالابىن سايتتاعى اقاۋلاردىڭ كەسىرىنەن ورىنداۋ مۇمكىن بولماي جاتىر. ۆەدومستۆودا مۇعالىمدەردىڭ «كۇندەلىكتى» ءبىر ۋاقىتتا تولتىرعاندا سايتتىڭ قاتىپ قالاتىنىن ەسكەرمەگەن بولۋ كەرەك»، - دەلىنەدى ساۋالدا.
«ەگەر جۇيە مۇنداي سالماقتى كوتەرە المايتىن بولسا، وندا ونى ەلىمىزدىڭ ءاربىر تۇكپىر-تۇكىپىرىنە ەنگىزۋدىڭ قاجەتى نە؟ ءارى بۇل ماسەلەنىڭ جىل سايىن كوتەرىلەدى!
ەلىمىزدەگى 700-دەي مەكتەپتە ينتەرنەت ءالسىز، ال 100 شاقتى مەكتەپ عالامتورعا مۇلدەم قوسىلماعان. «كۇندەلىك» پورتالىنداعى اقاۋلارعا بايلانىستى مۇعالىمدەر ونى تۇنگى ۋاقىتتا تولتىرۋعا ءماجبۇر.
اۋىل مۇعالىمدەرى بولسا، ينتەرنەتتىڭ جوقتىعىنان اۋدان ورتالىقتارىنا بارىپ، نە «كۇندەلىكتى» قالاداعى تۋىس-تۋعاندارى ارقىلى تەلەفونمەن تولتىرۋدا.
جۇيە 500 سۇراۋدان كەيىن توقتاپ قالىپ جاتىر. ەلىمىزدە 2 ملن 800 مىڭ وقۋشى بار دەسەك، ءاربىر مينۋت سايىن سايتقا ەكى مىڭ سۇرانىم تۇسەدى. ياعني، تەوريالىق تۇرعىدا جۇيەنىڭ تولىققاندى جۇمىس ىستەۋگە قاۋھارسىز ەكەنىن ايتۋعا بولادى»، − دەدى كەڭەس عاپارۇلى.
دەپۋتاتتى، سونداي-اق، قوسىمشادا كۇمان تۋعىزار جارنامانىڭ ورناتىلۋى الاڭداتادى. مىسالى، 20 قازان كۇنى، قوسىمشادا ەمتيحان تاپسىرۋعا ارنالعان حريستياندىق دۇعانىڭ، ءىنجىلدىڭ، يكونالاردىڭ جانە ت.ب. ءدىني اتريبۋتيكانىڭ جارناماسى تۇرعان.
«اق جول» ءدىني ناسيحاتتىڭ تا، وقۋ پروتسەسىندەگى كەز كەلگەن جارنامانىڭ دا «ءبىلىم بەرۋ تۋرالى» زاڭىنا قايشى كەلەتىنىنە سەنىمدى. ەگەر بۇل حاكەرلەردىڭ ارەكەتى بولسا، وندا ول قوسىمشانىڭ ءالسىز ەكەنىن قايتا دالەلدەيدى. بۇل فاكت، «اق جول» پارتياسىنىڭ 2018 جىلعى 11 ءساۋىر مەن 2019 جىلعى 30 قاڭتارىندا جولداعان ساۋالدارىندا كوتەرىلگەن − ءبىزدىڭ بالالارىمىزدىڭ جەكە مالىمەتتەرىن قورعاۋ ماسەلەسىنە اكەلەدى.
«اق جول» پارتياسى جوعارىدا ايتىلعان ماسەلەلەردى ەسكەرە وتىرىپ، ەلىمىزدەگى بارلىق مەكتەپ ينتەرنەتكە قوسىلمايىنشا، «كۇندەلىك» قوسىمشاسىن مىندەتتى پايدالانۋ تالابىن شەگەرە تۇرۋدى سۇرايدى. وسى ارالىقتا جۇيەنى قاۋىپسىزدىك جانە اقاۋدى جوندەۋ تۇرعىسىنان جەتىلدىرۋ كەرەكتىگىن دە ايتتى.
