24 قازان كۇنى قوعامدىق كەڭەستىڭ كەزەكتى وتىرىسىندا شىمكەنت قالاسى ساۋلەت جانە قالا قۇرىلىسى باسقارماسىنىڭ باسشىسى ورىنباسارىنىڭ مىندەتىن اتقارۋشى ءا.لەسبەكوۆ ەسەپ بەردى. اتالعان باسقارمانىڭ جۇمىسىنا قاتىستى بىرقاتار سىن ايتىلدى. جيىن بارىسىندا شىمكەنت قالاسىندا 1000-نان استام نىساننىڭ قۇرىلىسىن جۇمىستارىندا زاڭسىز ارەكەتگە جول بەرىلگەنى بەلگىلى بولدى.
بۇگىن زاڭسىز جۇمىستاردىڭ سەبەبىن ءبىلۋ ءۇشىن ساۋلەت جانە قالا قۇرىلىسى باسقارماسىنىڭ ورىنباسارى ارحاباەۆ نۇرلاندى قابىلدادىم. بەلگىلى بولعانداي، مىڭنان اسا نىساننىڭ زاڭسىز سالىنعانى جونىندە قالا قۇرىلىسىن باقىلاۋ باسقارماسىنا 70-تەن اسا ءتيىستى حات جازىلعان.
الايدا ول حاتتار «گاسك-كە» بارماعان. ناقتىراق ايتساق شىمكەنتتەگى قالا قۇرىلىسىن باقىلاۋ باسقارماسىنىڭ باسشىسى بەرىك دۇيسەنوۆكە جەتپەگەن. مىسالى، مىنا سۋرەتتەگى نىسانداردىڭ قۇجاتتارى بولماسا دا قابىلدانىپ قويعان ەكەن.
بۇنىڭ ءبارى قىلمىستى جابۋدىڭ ءبىر جولى ەمەس پە؟ الدە حاتتاردىڭ تىركەلمەۋى باسقارما باسشىسىنىڭ جۇمىسىنداعى زاڭسىزدىقتاردى جاسىرۋ ما؟ بۇل حاتتار نەگىزىندە قۇرىلىس نىساندارىن باقىلاۋعا الىنىپ، تەكسەرىلۋى كەرەك. ال ساۋلەت جانە قالا قۇرىلىسى باسقارماسى زاڭسىز قۇرىلىستاردى تەكسەرتۋدىڭ ورنىنا وزدەرى زاڭسىزدىقتارعا جول بەرۋدە.
نەگە؟ مىسالى، ءبىر قۇرىلىس نىسانىنىڭ جوبالىق سمەتالىق قۇجاتتارىن ازىرلەۋگە، ساراپتاما وتكىزۋگە قوماقتى قاراجات (2 ملن.تەڭگەمەن 20 ملن.تەڭگەنىڭ اراسى) قاجەت. ساۋلەت جانە قالا قۇرىلىسى باسقارماسى بولسا بىردە-ءبىر قۇجاتسىز قۇرىلىستى قابىلداپ جۇرگەنى زاڭسىز، بارىپ تۇرعان قىلمىستىڭ ورداسى ەمەس پە دەگەن وي كەلەدى.
جوعارىدا اتالعان زاڭسىز قۇرىلىس نىساندارى، تويحانا بولماسا بيزنەس عيماراتتارى كۇندەردىڭ ءبىر كۇنىندە قۇلاپ قالىپ، ادام شىعىنىنا الىپ كەلمەسىنە كىم كەپىلدىك بەرەدى؟
شىمكەنت قالاسىنىڭ قالا قۇرىلىسىن باقىلاۋ باسقارماسى، شىمكەنت قالاسىنىڭ پروكۋراتۋراسى، شىمكەنت قالاسى اكىمدىگىنىڭ اپپاراتى جانە سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ شىمكەنت قالاسى بويىنشا دەپارتامەنتى بۇل زاڭسىزدىقتارعا تەكسەرىستەر جۇرگىزۋى قاجەت.
نۇرعازى بۇحارباي،
شىمكەنت قالاسى قوعامدىق كەڭەستىڭ توراعاسى،
ماسليحاتتاعى «Nur Otan» فراكتسياسىنىڭ مۇشەسى.
