26 قازاندا تۇستەن كەيىن نۇر-سۇلتاندا "استانا" كونتسەرت زالىنىڭ ماڭىندا پوليتسيا ون شاقتى ادامدى ۇستاپ اكەتتى. مۇندا "وپپوزيتسيالىق قوزعالىستىڭ ميتينگىسى وتەدى" دەپ بۇعان دەيىن حابارلانعان. ارنايى جاساق وكىلدەرىنىڭ بىرنەشە ادامدى ۇستاعانىنا ازاتتىق ءتىلشىسى دە كۋا بولدى. ولاردىڭ كەيبىرى ءجاي جۇرگەنىن ايتىپ، پوليتسيانىڭ ۇستاۋىنا نارازى بولدى. ۇستالعانداردىڭ كەيبىرى "قىتايعا جول جوق" دەپ ايعايلادى. بىرنەشە ادام قۇجاتتارىن تەكسەرگەن پوليتسيا ارەكەتىنە اشۋلاندى.
ازاتتىقتىڭ تىكەلەي ەفيرىن كورىڭىز:
ۇستاۋعا بايلانىستى تۇسىنىكتەمە بەرگەن نۇر-سۇلتان قالالىق پوليتسيا دەپارتامەنتى باستىعىنىڭ ءبىرىنشى ورىنباسارى باقىتجان مالىباەۆ ء"ابليازوۆ ۇيىمداستىرعان ميتينگىگە" بايلانىستى ازاماتتارعا ەسكەرتۋ جاسالعانىن، "پوليتسەيگە قارسىلىق كورسەتكەندەردىڭ" ۇستالعانىن ايتتى.
الماتىدا دا پوليتسيا تولە بي مەن پانفيلوۆ كوشەسىنىڭ قيىلىسىندا وننان استام ادامدى ۇستاعان. ولاردىڭ كەيبىرى قىتاي زاۋىتتارىنىڭ سالىنۋىنا قارسىلىق ءبىلدىرىپ، تالابىن ايتا باستاعان. بىراق پوليتسيا ولارعا پىكىرىن اياقتاتپادى. ارنايى جاساق ء"جاي ءجۇرمىن" دەگەن ادامداردى دا ۇستادى. اكىمدىك قىزمەتكەرلەرى "ميتينگى ورنىندا" جۇرگەندەرگە تاراۋ قاجەتتىگىن ايتىپ ەسكەرتتى.
ازاتتىقتىڭ شىمكەنتتەگى ءتىلشىسىنىڭ حابارلاۋىنشا، مۇندا دا "ناۋرىز" الاڭىندا پوليتسيا ءۇش ادامدى ۇستاپ الىپ كەتكەن. ولاردىڭ ءبىرى "قىتاي ەكسپانسياسىنا" قارسى ەكەنىن ءبىلدىرىپ، الاڭعا سول پىكىرىن ايتۋ ءۇشىن كەلگەنىن ايتقان. وقيعانى ءتۇسىرۋ بارىسىندا قارا ءتۇستى قولشاتىر ۇستاعان ەكى ادام ۇستاۋلاردى كامەراعا تۇسىرگەن ازاتتىق ءتىلشىسىنىڭ جۇمىسىنا كەدەرگى كەلتىردى.
بۇعان دەيىن ءوزىن بيلىك وپپونەنتى رەتىندە اتايتىن، شەتەلدە جۇرگەن قۋعىنداعى بۇرىنعى بانكير مۇحتار ءابليازوۆ 26 قازاندا جاقتاستارىن كوشەگە شىعۋعا شاقىرعان. قازاقستاننىڭ باس پروكۋراتۋراسى "رۇقسات ەتىلمەگەن ميتينگىگە قاتىسۋ زاڭسىز" ەكەنىن ەسكەرتىپ، ميتينگىگە شىققان ازاماتتاردىڭ " قاتاڭ جازالاناتىنىن" حابارلادى.
"ازاتتىق" راديوسى