اقجولدىقتار مەملەكەتتىك حولدينگتاردىڭ تابىس ديۆيدەندىنىڭ بيۋدجەتكە اۋدارىمىن الدەقايدا ۇلعايتۋدى تالاپ ەتەدى

18245

«اق جول» دەپۋتاتتارى مەملەكەتتىك حولدينگتاردىڭ تابىس ديۆيدەندىنىڭ بيۋدجەتكە اۋدارىمىن الدەقايدا ۇلعايتۋدى تالاپ ەتەدى – بۇل تۋرالى ازات پەرۋاشەۆ 2020-2022 جىلدارعا ارنالعان رەسپۋبليكالىق بيۋدجەتتى تالقىلاۋ بارىسىندا مالىمدەدى. 

«بيۋدجەتتى تولتىرۋدىڭ سۇبەلى رەزەرۆىن سامۇرىق-قازىنا» ءال-اۋقاتتىق قورى، «بايتەرەك»، «قازاگرو» سىندى مەملەكەتتىك حولدينگ پەن ۇلتتىق كومپانيالاردىڭ تابىسىنان كورۋگە بولادى».

ەگەر رەسپۋبليكالىق مەملەكەتتىك كاسىپورىندار بيۋدجەتكە ديۆيدەند ەسەبىنەن 50%-عا دەيىن تابىسىن ءبولىپ وتىرسا، اتالمىش مەگا-سۋبەكتىلەر ءۇشىن مۇلدەم بولەك پارامەترلەر بەلگىلەنگەن.  مىسالى، 2018 جىلعى تازا تابىس كولەمى «سامۇرىق-قازىنادا» 821 ملرد تەڭگە بولسا، «بايتەرەك» حولدينگىنىكى 80 ملرد تەڭگەنى قۇراعان. سۋبەكتىلەردىڭ ەل ەكونوميكاسىنىڭ 60%-ن قۇراپ وتىرعانىنا جانە ونىڭ كوپ بولىگى ءدال وسى بيۋدجەتتەن كەلەتىنىنە قاراماستان، ولاردىڭ جىل سوڭىنداعى مەملەكەت پاكەت اكتسيالارى ديۆيدەندى 19 ملرد تەڭگە، ياعني تابىستىڭ 2%-ىن عانا قۇراعان.

تاياۋدا ۇكىمەتتىڭ بيۋدجەتتى ناقتىلاۋ بارىسىندا اتالمىش ديۆيدەندتەردىڭ 50 ملرد تەڭگەگە ءوسۋى قۋانتارلىق دۇنيە. 

سونىڭ وزىندە بۇل مەملەكەتتىك حولدينگتەردىڭ تازا تابىسىنىڭ 10% عانا قۇرايدى. 

«وسىعان وراي، «اق جول» پارتياسى ورىن العان ماسەلەنى قايتا قاراپ، كۆازي مەملەكەتتىك سەكتوردىڭ بيۋدجەتكە بولىنەتىن ديۆيدەندىن ۇلعايتۋدى مىندەتتەۋدى سۇرايمىن»، دەدى پەرۋاشەۆ. 

پارتيا دەپۋتاتتارى مەملەكەتتىڭ ازاماتتارعا جان-جاقتى الەۋمەتتىك قولداۋ كورسەتىپ جاتقان كەزىندە، بيۋدجەتكە كىرىستى كۆازي مەملەكەتتىك سەكتور تاراپىنان ۇلعايتۋ كەرەك دەپ ەسەپتەيدى. 

«اق جول» پارتياسىنىڭ ءباسپاسوز قىزمەتى

 

پىكىرلەر
رەداكتسيا تاڭداۋى