قازاق-وزبەك شەكاراسىنداعى باقىلاۋ-وتكىزۋ بەكەتى جابىلادى

426

جاياۋ جۇرگىنشىلەر مەن كولىك قۇرالدارىنىڭ قوزعالىسى وسى جىلدىڭ 1 قاراشاسىنان باستاپ توقتاتىلادى دەپ جوسپارلانۋدا.

 قازاق-وزبەك شەكاراسىنداعى "قونىسباەۆ" وتكىزۋ بەكەتىن قايتا قۇرۋ ءۇشىن 2020 جىلعا دەيىن جابادى. بۇل تۋرالى وزبەكستاننىڭ مەملەكەتتىك كەدەن كوميتەتىنىڭ رەسمي سايتىندا ايتىلعان.

سالالىق ۆەدومستۆونىڭ مالىمەتىنشە، جاياۋ جۇرگىنشىلەر، جەڭىل جانە جۇك كوتەرگىشتىگى 3,5 تونناعا دەيىنگى جۇك كولىكتەرىنىڭ قوزعالىسى 1 قاراشادان باستاپ توقتاتىلادى.

وسىعان بايلانىستى وزبەكستاننىڭ مەملەكەتتىك كەدەن كوميتەتى جاياۋ جۇرگىنشىلەر، تاۋارلار مەن كولىك قۇرالىن وتكىزەتىن سىرتقى ەكونوميكالىق قىزمەتكە قاتىسۋشىلار بالاما باقىلاۋ-وتكىزۋ پۋنكتتەرى ارقىلى شەكارادان وتە الاتىنىن حابارلايدى.

قازاقستاننىڭ "قونىسباەۆ" شەكارالىق باقىلاۋ-وتكىزۋ بەكەتى تۇركىستان وبلىسىندا ورنالاسقان. شەكارا وتكەلىندە وزبەكستان جاقتان تاشكەنت وبلىسىنىڭ چيناز اۋدانىندا اشىلعان "ياللاما" وتكىزۋ پۋنكتى بار.

 

پىكىرلەر