دەموكراتيا قارلىعاشى

469

جاڭا عاسىردىڭ العاشقى جىلدارى ەل ىشىندە "دات" گازەتىنىڭ ىقپالى سۇمدىق ەدى. اۋىلدا جۇرت گازەتتى قولدان-قولعا تيگىزبەي وقيتىن. ء"اي، وسى گازەت جازادى-ەي" دەگەن اڭگىمەنى ءار اۋىلدان ەستۋگە بولاتىن. سول كەزدەرى "دات" ءبىزدىڭ ۇيدە دە تۇراتىن. جاڭا نومەرىنىڭ ۇيگە قالاي جەتەتىنى بەيمالىم، بىراق وسى گازەت ۇيدەن ۇزىلمەدى. وقۋشى بالا ارمانىما جۋرناليست بولامىن دەگەن ماقسات وسى "دات" پەن "جاس الاشتان" قالىپتاسسا كەرەك.

ستۋدەنت بولىپ وقۋعا تۇسكەنىمدە دە قالتامداعى سوڭعى تيىنىما "داتتى" ساتىپ الاتىنمىن. باس رەداكتورى باقىتگۇل ماكىمباي دەپ شىعاتىن "دات" سول كەزدەگى قوعامنىڭ قوياسىن اقتارىپ، بيلىكتىڭ بۇيىرىنە شانشۋداي قادالاتىن. باقىتگۇل ماكىمبايدىڭ بەتىڭ بار، ءجۇزىڭ بار دەپ قاراماي سويىپ سالاتىن ماقالالارىنان تالاي شەندى جاسقانىپ جۇرەتىن. سۇحباتتارىنداعى سۇراقتارى دا ءوزى سەكىلدى وتكىر دە وجەت. جۋرناليستيكاعا قادام باسقان قانشاما قىزدار باقىتگۇل اپايداي بولساق دەپ ارماندادى

.

باقىتگۇل ماكىمباي بۇرىنعى سەمەي وبلىسى اقسۋات اۋدانى 22 پارتسەزد سوۆحوزى قۇمكول اۋىلدىق سوۆەتىندە 1962 جىلى 15 قازان  كۇنى دۇنيەگە كەلگەن. تۋعان اۋىلىنداعى  م.ي.كالينين اتىنداعى ورتا مەكتەپتى 1979 جىلى ءبىتىردى. بىلەتىندەر باقىتگۇلدىڭ ومىرىندەگى العاشقى ادىلەتسىزدىك سول مەكتەپ بىتىرەتىن جىلى باستالعان دەيدى. ساباعىن ۇزدىك وقىعان العىر قىز مەكتەپتى "التىن بەلگىگە" بىتىرە الماپتى. دۇرىسى بىتىرتپەپتى. ونىڭ ورنىنا سول كەزدەگى باستىقتىڭ بالاسىن ۇسىنىپ، ماكىمباي ەكىنشى كەزەككە ىسىرىلىپ قالادى. ۇلكەن ومىرگە باسقان قادامى ادىلەتسىزدىكتەن باستالعان باقىتگۇل 40 جىلعا جۋىق ءومىرىن اقيقات پەن شىندىققا ارناپ كەلەدى. ساياساتتىڭ زاڭعار تۇلعالارى مەن قوعام قايراتكەرلەرى باقىتگۇلدىڭ ەڭبەگىن باس بارماقپەن باعالادى.

كەشە وسى ءبىر قايسار دا وجەت قىزدىڭ تۋعان كۇنى ەكەن. تۋعان كۇنىڭىزبەن باقىتگۇل اپاي! قازاق جۋرناليستيكاسىنىڭ سىزگە وكپەسى جوق! وكپە سىزدە بولماسا.

وڭعار قابدەن

"ادىرنا" ۇلتتىق پورتالى

 

 

پىكىرلەر