ۇشاق اپاتىنان سوڭ. ءۇندىستاندا تىكۇشاق قۇلاپ، جولاۋشىلار قازا تاپتى

ءۇندىستاننىڭ سولتۇستىگىندەگى گيمالاي تاۋىندا تىكۇشاق اپاتقا ۇشىرادى، دەپ حابارلايدى "ادىرنا" ۇلتتىق پورتالى ANI اگەنتتىگىنە سىلتەپ. 15 ماۋسىم كۇنى تاڭعى ساعات 5:20-دا كەدارناتح اۋىلىنان گۋپتكەشي باعىتىندا ۇشىپ كەلە جاتقان Aryan Aviation كومپانياسىنا تيەسىلى تىكۇشاق گاۋريكۋند پەن سونپرياگ اراسىنداعى ورماندى القاپتا قۇلاعان. تىكۇشاق بورتىندا 7 ادام بولعان. ولاردىڭ - التاۋى جولاۋشى، ءبىر ۇشقىش. بارلىعى قازا تاپتى. قازا تاپقانداردىڭ اراسىندا ءسابي دە بار. الدىن الا مالىمەت بويىنشا، اپاتقا قولايسىز اۋا رايى سەبەپ بولۋى مۇمكىن. ۇشقىش اۋا رايىنىڭ كۇرت ناشارلاعانىن بايقاپ، تىكۇشاقتى اڭعاردان شىعارۋعا تىرىسقان. اپاتتان كەيىن تىكۇشاق ورتەنىپ كەتكەن. قايعىلى وقيعادا ماحاراشترا شتاتىنان كەلگەن دجايسۆال وتباسىنىڭ ءۇش مۇشەسى قازا تاپتى. وقيعا ورنىن العاش بولىپ جەرگىلىكتى تۇرعىندار بايقاپ، قۇزىرلى ورگاندارعا حابار بەرگەن. قۇتقارۋ وپەراتسياسىنا ۇلتتىق جانە شتاتتىق اپاتقا قارسى قىزمەت وكىلدەرى تارتىلىپ، بارلىق مايىتتەر ساعات 8:55-تە تابىلدى. دنق ساراپتاماسى ارقىلى قازا تاپقانداردىڭ جەكە باسى رەسمي تۇردە انىقتالماق. بۇل — سوڭعى التى اپتادا كەدارناتح ماڭىندا تىركەلگەن بەسىنشى تىكۇشاق اپاتى. وسى ۋاقىت ارالىعىندا 13 ادام قازا تاپقان. ايتا كەتەيىك، بۇعان دەيىن 12 ماۋسىمدا ءۇندىستاندا Air India اۋە كومپانياسىنىڭ ۇشاعى اپاتقا ۇشىراعان بولاتىن. ۇشاقتا 240-تان استام ادام بولعان. پوليتسيا 11A ورنىنان ءبىر ءتىرى قالعان جولاۋشىنى تاپتى.