قارجاۋباي نۇرىموۆتىڭ وتباسىنا “قىسىم كورسەتتى” دەگەن ايىپپەن “دوكتور” زاڭ الدىندا جاۋاپكەرشىلىككە تارتىلدى، دەپ حابارلايدى “ادىرنا” ۇلتتىق پورتالى ۇلىسمەدياعا سىلتەپ.
بۇل تۋرالى ادۆوكات مەيىرمان شەكەەۆ ءوزىنىڭ Instagram پاراقشاسىندا مالىمدەگەن.
ادۆوكاتتىڭ ايتۋىنشا، “دوكتور” لاقاپ اتىمەن الەۋمەتتىك جەلىدە تانىلعان ازامات – ءابدىراحمان باۋىرجان – قارجاۋباي نۇرىموۆ پەن ونىڭ وتباسىنا ۇزاق ۋاقىت بويى اڭدۋ، قورقىتۋ جانە ارانداتۋ ارەكەتتەرىن جاساعان. بۇل ماسەلەگە قاتىستى سوت وتىرىسى ءوتتى.
سوتتا ادۆوكات ناقتى تالاپتارىن جاريا ەتتى.
“جاۋاپكەر TikTok جەلىسىندەگى maskarad778 جانە باسقا اككاۋنتتارىندا قارجاۋباي پولاتۇلىنان رەسمي تۇردە كەشىرىم سۇراپ، بەينەجازبا جاريالاۋى ءتيىس. بۇل ۆيدەو 30 كۇن بويى اشىق كۇيدە تۇرۋى كەرەك”، – دەدى ادۆوكات مەيىرمان شەكەەۆ.
سۋديا جاۋاپكەردەن كىناسىن مويىندايتىنىن سۇراعاندا، ءابدىراحمان باۋىرجان ءبارىن راستاعان.
“ايتقانىمدى مويىندايمىن”، – دەپ جاۋاپ بەردى.
مەدياتسيا جولىمەن تاتۋلاسۋعا بولا ما دەگەن سۇراققا جاۋاپ بەرۋ كەزىندە ادۆوكات قارسى تاراپقا تىكەلەي ساۋال قويدى. “قارجاۋبايدىڭ وتباسىن نە سەبەپتى اڭدىدىڭىز؟” دەگەن ساۋالعا:
“قازاقستان ازاماتى، قازاق بولعان سوڭ، ول جەردە بولعان ءىستى كورىپ، اشۋلانىپ، سونىڭ ءبارىن ىستەدىم. بۇل – مەنىڭ ازاماتتىق پوزيتسيام. مەن ونى باتىر قىلۋعا جول بەرمەيمىن”، – دەپ جاۋاپ بەردى.
ەسكە سالا كەتەيىك، قارجاۋباي نۇرىموۆ بۇعان دەيىن سوتتان تۇسەتىن مورالدىق وتەماقىنى بالالار ۇيىنە اۋدارۋعا نيەتتى ەكەنىن ايتقان بولاتىن.
ۇقساس جاڭالىقتار
