«ءاليا – عۇمىر» اتتى شاراعا وبلىس اكىمى اسحات شاحاروۆ پەن قازاقستان رەسپۋبليكاسى پرەزيدەنتىنىڭ كەڭەسشىسى مالىك وتارباەۆ قاتىستى.
كوپشىلىككە ايىرىقشا اسەر قالدىرعان ۆيزۋالدى بەينەلەر شوۋى اڭىز تۇلعانىڭ مەرەيتويىن اتاپ وتۋدە ۇمىتىلماستاي اسەر سىيلادى.
مەرەيتويدىڭ باستى سالتاناتى «قازاق حالقىنا مىڭ العىس» ستەلاسى الاڭىندا ءوتتى. كوپشىلىك كەرەمەت كەشتىڭ كۋاسى بولدى. ساحنا تورىندە جەرگىلىكتى ونەرپازدار مەن ارنايى شاقىرتۋمەن كەلگەن ەسترادا جۇلدىزدارى مەن ارتىستەر ونەر كورسەتتى. اللابەرگەن جاقسىباەۆ، ريتا جانە دۋلات ايتجانوۆتار، قانات پەن سۆەتلانا ايتباەۆتار، ميراس پەن قۇرالاي بەكجانوۆتار، مارات ءايتىموۆ، ءاليحان زەينوللا جانە وزگە دە ونەرلى جەرلەستەرىمىز بار. جۇلدىزدار ساحاناعا شىقپاس بۇرىن، تەلەكوپىر ارقىلى بايلانىسقا شىعىپ، اقتوبەلىكتەرگە جىلى لەبىزدەرىن ارنادى. سودان سوڭ، ونەر يەلەرى ساحنادا كوپتىڭ جۇرەگىن جاۋلاعان سۇيىكتى اندەردى ورىندادى.
كوپكە تانىمال ءانشى سادراددين، قازاق ونەرىنىڭ اڭىزعا اينالعان تۇلعاسى روزا رىمباەۆانىڭ ءان شىرقاۋى مەرەكە كوركىن ودان ءارى قىزدىردى. سادراددين «ۇيگە»، «قانشا كۇن؟»، «باقىت»، «جاۋاپ بار ما؟» كوپكە بەلگىلى حيت اندەرىن ورىنداسا، حالىق ءارتىسى روزا رىمباەۆا كورەرمەننىڭ سۇيىكتى «ليۋبوۆ ناستالا»، «سول ءبىر كەزدەر»، «شاقىرادى كوكتەم»، «بالداۋرەن» اندەرىن شىرقادى. كەش ءانشىنىڭ ورىنداۋىنداعى باتىرلىقتىڭ نىشانىن اسپەتتەيتىن «ءاليا» انىمەن قورىتىندىلاندى. 
ال اقتوبە اسپانىنا سينحروندى تۇردە كوتەرىلگەن 550 دانا دروننىڭ شوۋى تاڭعاجايىپ كورىنىستەردى بەينەلەدى. كوپشىلىك ءاليا مولداعۇلوۆا، ديماش قۇدايبەرگەن، اقتوبە ءوڭىرىنىڭ كورىكتى جەرلەرىن جانە وزگە دە ۆيزۋالدى كومپوزيتسيالاردى تاماشالادى. ەل بايراعى كورسەتىلگەندە، 40 مىڭنان اسا كورەرمەن مەملەكەتتىك گيمندى ءبىر مەزەتتە ورىندادى. جارىق شوۋ لازەرمەن جانە اسەم اۋەندەرمەن سۇيەمەلدەندى. دروندار شوۋىن Aspan Galaxy ۇسىندى.
جىل باسىنان بەرى ءاليا مولداعۇلوۆانىڭ 100 جىلدىعىنا ارنالعان ءىس-شارالار تاريحىمىز بەن مادەنيەتىمىز ءۇشىن بىرلىك پەن ماقتانىشتىڭ ناعىز سيمۆولىنا اينالدى. ەكى كۇنگە جالعاسقان مەرەيتويلىق شارالار اۋقىمدى باعدارلامامەن اياقتالدى. ونىڭ اياسىندا سپورتتىق جارىستار، مەرەكەلىك كونتسەرتتەر، تەاترلاندىرىلعان قويىلىمدار جانە باتىر ەسكەرتكىشتەرىنە گۇل شوقتارىن قويۋ راسىمدەرى ءوتتى. بۇل شارالار وبلىس تۇرعىندارى مەن قوناقتاردىڭ باسىن بىرىكتىردى، جاستارعا رۋح بەردى جانە بارشاعا قازاقتىڭ مەرگەن قىزىنىڭ ۇلى وشپەس ەرلىگىن ەسكە سالىپ، ونىڭ كەلەر ۇرپاققا ماڭگىلىك باعدار بولىپ قالا بەرەتىنىن كورسەتتى.
ءاليا مولداعۇلوۆانى ۇلىقتاۋ جانە وعان دەگەن قۇرمەت اقتوبەلىكتەردىڭ جۇرەگىندە ماڭگىگە ساقتالماق، ال مەرەيتويلىق ءىس-شارالار جەرلەسىمىزدىڭ وشپەس مۇراسىنىڭ جارقىن ايعاعىنا اينالدى.
