بەيسەنبى كۇنى تۇندە يزرايل يرانداعى نىساندارعا سوققى جاساي باستادى. ەل بيلىگى يراننىڭ يادرولىق باعدارلاماسىنا شابۋىل جاساعاندارىن مالىمدەدى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
قازىر ەلدە تەگەراننان كەلۋى مۇمكىن جاۋاپ سوققىلارىن كۇتىپ، توتەنشە جاعداي جاريالانعان.
«ءبىز يراننىڭ يادرولىق باعدارلاماسىنىڭ جۇرەگىنە سوققى بەردىك. نىسانا رەتىندە ناتانزداعى ۋران بايىتۋ بويىنشا باستى وبەكت تاڭدالدى. سونىمەن قاتار، ءبىز يراننىڭ بالليستيكالىق زىمىران جاساۋ باعدارلاماسىنىڭ وزەگىنە دە سوققى جاسادىق»، - دەدى يزرايل پرەمەر-ءمينيسترى بينيامين نەتانياحۋ بەينەۇندەۋىندە.
ول سونىمەن بىرگە اسكەري كۇشتەردىڭ يراندىق يادرولىق عالىمدارعا دا سوققى جاساعانىن اتاپ ءوتتى.
نەتانياحۋدىڭ ايتۋىنشا، وپەراتسيا يران تاراپىنان كەلەتىن قاۋىپ جويىلعانشا قانشا كۇن قاجەت بولسا، سونشا ۋاقىت جالعاسادى.
وپەراتسيانىڭ باستالعانىن حابارلاي وتىرىپ، ءيزرايلدىڭ قورعانىس ءمينيسترى يسراەل كاتس ەلدە «ەرەكشە توتەنشە جاعداي» ەنگىزىلگەنىن مالىمدەدى جانە يراننىڭ قارسى سوققىسى جاقىن ارادا بولادى دەپ كۇتىلۋدە.
«يزرايل مەملەكەتىنىڭ يرانعا جاساعان الدىن الۋ سوققىسىنان كەيىن جاقىندا يزرايل مەن ونىڭ بەيبىت تۇرعىندارىنا زىمىران جانە درونمەن شابۋىل جاسالۋى مۇمكىن»، - دەلىنگەن مالىمدەمەدە.
ءيزرايلدىڭ يرانعا جاساعان شابۋىلى كەزىندە يران يسلام رەۆوليۋتسياسى ساقشىلار كورپۋسىنىڭ باس شتابىنىڭ باستىعى حوسسەين سالامي مەن يسلامدىق ازاد ۋنيۆەرسيتەتىنىڭ پرەزيدەنتى موحامماد تەحرانچي قازا تاپقان.
IRNA اگەنتتىگىنىڭ دەرەكتەرىنە سۇيەنسەك، يران قارۋلى كۇشتەرى باس قولباسشىسىنىڭ ورىنباسارى گەنەرال گولامالي راشيد جانە 2011–2013 جىلدارى اتوم ەنەرگەتيكاسى ۇيىمىن باسقارعان اتومشى-عالىم فەرەيدۋن ابباسي دە كوز جۇمعان.
باسىلىمنىڭ جازۋىنشا، يزرايل وپەراتسيانى يران ارمياسىنىڭ جوعارى شەندى قولباسشىلارى تۇراتىن اۋدانداردا جۇرگىزگەن. شابۋىل سالدارىنان يران ارمياسى باس شتابىنىڭ باسشىسى مەن بىرنەشە تانىمال يادرولىق عالىمدار قازا تاپتى.
