ازەربايجان سوتى تاۋەلسىز Toplum TV رەداكتسياسىنىڭ توعىز جۋرناليسىنە ۇكىم شىعاردى، دەپ حابارلايدى “ادىرنا” ۇلتتىق پورتالى.
جەرگىلىكتى باق دەرەگىنشە، ولاردىڭ اراسىندا باق-تىڭ نەگىزىن قالاۋشىلار اكيف گۋربانوۆ پەن رۋسلان يززەتلي 15 جىلعا باس بوستاندىعىنان ايىرىلدى.
سونىمەن قاتار ۆيدەو رەداكتور مۋشفيگ دجابباروۆ، جوبا ۇيلەستىرۋشىلەرى يلكين امراحوۆ پەن راميل باباەۆ 13 جىلدان، جۋرناليستەردى وقىتقان الي زەينالوۆ پەن مەديا زاڭگەرى، Toplum TV نەگىزىن قالاۋشى الەسكەر مامەدلي 14 جىلدان، ءتىلشى فاريد يسمايلوۆ پەن SMM-مەنەدجەر ەلمير ابباسوۆ 12 جىلدان تۇرمە جازاسىن الدى.
Toplum TV ازەربايجانداعى مينيسترلىكتەردەگى جەمقورلىق، ەل ەكونوميكاسىنىڭ جاي-كۇيى، تسەنزۋرا جانە الەۋمەتتىك ماسەلەلەر تۋرالى زەرتتەۋ ماتەريالدارىمەن تانىمال. 2024 جىلدىڭ ناۋرىزىندا پوليتسيا رەداكتسيا كەڭسەسىنە ءتىنتۋ جۇرگىزىپ، قىزمەتكەرلەردىڭ باسىم بولىگىن قاماۋعا العان ەدى.
جۋرناليستەرگە شەتەلدىك قارجىلاندىرۋعا قاتىستى زاڭ نەگىزىندە الدىمەن اقشا كونترابانداسى بويىنشا، كەيىن زاڭسىز كاسىپكەرلىك، قارجى جىمقىرۋ، سالىقتان جالتارۋ جانە قۇجاتتاردى قولدان جاساۋ باپتارى بويىنشا ايىپ تاعىلدى.
ال ەۋروپا كەڭەسى پارلامەنتتىك اسسامبلەياسى بۇل ءىستى «ازەربايجانداعى سىني پىكىرلەردى تۇنشىقتىرۋ ارەكەتى» دەپ باعالاعان.
