جىمپيتى اۋىلىندا ءبىر وتباسىنىڭ بەس بالاسىن سوڭعى ساپارعا شىعارىپ سالدى، دەپ حابارلايدى “ادىرنا” ۇلتتىق پورتالى Orda.kz-كە سىلتەپ.
قايعىلى وقيعا وتباسىنىڭ ۇيىندە بولعان ءورت سالدارىنان ورىن الدى. بۇلدىرشىندەر – 6 جاستاعى رايان، 5 جاستاعى رايس، 4 جاستاعى ديار، 2 جاستاعى نۇرحان جانە 8 ايلىق ءاليحان ۋلى گازدان ۋلانىپ كوز جۇمدى. وقيعا كەزىندە اتا-انالارى جۇمىستا بولعان.
Orda.kz مالىمەتىنشە، سابيروۆتار — اتا-اناسىز وسكەن، ەكەۋى دە جەتىم. تۋىستارىنىڭ ايتۋىنشا، ەرگەن سابيروۆ — جىمپيتىنىڭ تۇرعىنى، ال جۇبايى اتىراۋدان. بۇعان دەيىن اۋدانعا قاراستى الىس اۋىلداردىڭ بىرىندە تۇرىپ كەلگەن ولار وتكەن جىلى جىمپيتىعا كوشىپ كەلگەن. ءوز ۇيلەرى بولماعاندىقتان، كوپبالالى وتباسى رەتىندە تۇرعىن ءۇي كەزەگىنە تۇرعان.
«ماتەريالدىق جاعدايلارى قيىن ەدى. ەش جەردەن قولداۋ كورمەدى. قولداۋ بولعاندا، بالكىم، بۇل قايعىنىڭ الدىن الۋعا بولار ما ەدى؟ قازىر بىردەن بەس بالاسىنان ايىرىلىپ وتىر»، — دەدى وتباسىنىڭ تۋىسى جۇماقان ومبەتياروۆ.بالالاردىڭ دەنەلەرى جاقىن تۋىسىنىڭ ۇيىنەن شىعارىلدى. قوشتاسۋعا اۋىلدىڭ ەرەسەكتەرى مەن جاستارى جينالعان. سابيروۆتار تۇرعان ءۇيدىڭ ءبىر بولمەسى تولىعىمەن ورتەنىپ كەتكەن. ەكىنشى جارتىسى امان قالعان. بالالار ءدال سول امان قالعان بولمەدە جاتقان. ولاردى وت شالعان جوق، بىراق ءبارى دە ۋلى گازدان تۇنشىعىپ كوز جۇمعانى انىقتالدى. كورشى تىلەك امانباەۆتىڭ ايتۋىنشا، ول ءتۇتىندى بايقاپ، دەرەۋ ءورت سوندىرۋشىلەردى شاقىرعان. قۇتقارۋشىلار جىلدام جەتكەنىمەن، ءۇيدىڭ ەسىگى قۇلىپتاۋلى بولعاندىقتان، ولار باستاپقىدا ۇيدە ەشكىم جوق دەپ ويلاعان. تەك كورشىلەردىڭ ءبىرى ۇيدە بالالار بولۋى مۇمكىن ەكەنىن ەسكەرتكەن. كەيىننەن ەسىكتى بۇزىپ، ىشكە كىرگەندە عانا، بۇلدىرشىندەردىڭ دەنەسى تابىلدى. «بالالاردىڭ دەنەسىندە كۇيىك ىزدەرى بولمادى. ولار تۇتىننەن ۋلانعان»، – دەدى تىلەك امانباەۆ. جانازاعا سىرىم اۋدانىنىڭ اكىمى جۇماكەلدى باتىرنيازوۆ پەن جىمپيتى اۋىلىنىڭ اكىمى ميرام قايىرعاليەۆ كەلىپ، وتباسىنا كوڭىل ايتتى. سونىمەن قاتار وقيعا ورنىندا جەدەل جاردەم، پوليتسيا مەن تجد قىزمەتكەرلەرى كەزەكشىلىك ەتتى.
ۇقساس جاڭالىقتار
